Nuus24

Breytenbach-verhoor begin Dinsdag

2012-06-18 22:08
Johannesburg – Die dissiplinêre verhoor van die geskorste Nasionale Vervolgingsgesag (NVG)-aanklaer Glynnis Breytenbach sal Dinsdag begin.

“Ek kan bevestig dat dit van môre 10:00 af sal voortgaan,” het Mthunzi Mhaga, NVG-woordvoerder, Maandag gesê.

Die verhoor sal plaasvind by die NVG se hoofkwartiere in Silverton, Pretoria.

Breytenbach, die NVG se streekshoof van die gespesialiseerde kommersiële misdaadeenheid, is in Mei geskors vir gedrag wat verband hou met die manier waarop sy een van haar sake hanteer het.

Breytenbach word daarvan beskuldig dat sy haar mag misbruik het in ‘n ondersoek na ‘n bedrogaanklag wat deur die mynmaatskappy Kumba gelê is teen Imperial Crown Trading (ICT) en dat sy nie bevele om die ondersoek te staak gehoorsaam het nie.

Die NVG het mediaspekulasie verwerp dat die verhoor verband hou met bedrog- en moordaanklagte teen die voormalige misdaadintelligensiehoof lt. genl. Richard Mdluli, wat teruggetrek is.

Beeld het verlede week berig die NVG beskuldig Breytenbach daarvan dat sy onherstelbare skade aan sy beeld aangerig het.

Breytenbach het in hofdokumente wat ingedien is by die Arbeidshof in Johannesburg geargumenteer dat die NVG “uit eiebelang” opgetree het toe sy geskors is, het die koerant berig.

Die NVG het gesê Breytenbach weet haar skorsing hou verband met haar beweerde misbruik van mag in die Kumba/ICT-saak. Sy het na bewering die NVG se beeld en goeie naam skade berokken.

Die NVG het gesê die verhouding tussen Breytenbach en haar werkgewer het onherstelbaar afgebreek – ‘n oortreding waarvoor sy afgedank kan word indien sy skuldig bevind word, het Beeld berig.

- Volg Nuus24 op Twitter
 
SAPA
Lees meer oor:    glynnis breytenbach
«Terug