Suid-Afrikaners sou reeds Maandagaand al die donkerte ingestuur word indien Eskom in spitstye nie aan die vraag na elektrisiteit kon voldoen nie.
Die tekort aan elektrisiteit is so erg dat die kragvoorsiener gistermiddag, nog voor die verwagte aand-spitstyd, sy noodreserwekrag moes gebruik.
Alle waarskuwings dat daar probleme is, het gewys die naald is in die rooi – wat beteken die nasionale kragnetwerk is onder groot druk. “Ons gebruik al die noodvoorraad wat ons kan. Ons is baie bekommerd,” het Hilary Joffe, woordvoerder van Eskom, gesê.
Eskom het Maandag ook groot verbruikers gevra om aanlegte af te skakel. Verder is munisipale owerhede, soos die Kaapse stadsraad, in kennis gestel.
Die kragvoorsiener het altesaam 14% (sowat 5 000 MW) van sy kapasiteit om krag te voorsien, verloor. Joffe het gesê dié tekort is weens die kragsentrales wat vir geskeduleerde instandhouding moes afskakel, maar ook “allerlei tegniese probleme” wat veroorsaak het dat die sentrales net eenvoudig nie aan die verwagte vraag na krag kan voldoen nie.
Boonop is Eskom onseker oor hoeveel elektrisiteit landwyd nodig sal wees wanneer fabrieke ná die Desember-vakansie weer begin werk.
Wat Eskom vandag, die res van Januarie én die res van 2012 gaan doen, is onduidelik.
Die Kaapse Kamer van Koophandel het gesê hy is erg bekommerd oor die skramse inligting en Eskom se beplanning. Die kragvoorsiener het die Kamer gister meegedeel dat Suid-Afrikaners die volgende aantal weke deur beurtkrag in die gesig gestaar word.
Joffe het gesê Eskom sal alles in sy vermoë doen om beurtkrag te probeer vermy, maar die kragvoorsiener se situasie is “baie, baie knap”.
– Volg Nuus24 op Twitter