Nuus24

Hou Mandela Kersdag in gebede, vra Zuma

2012-12-24 17:45
Johannesburg – Oudpres. Nelson Mandela se dokters het bevestig dat hy Kersdag in die hospitaal sal deurbring, het Mac Maharaj, presidensiële woordvoerder, in 'n verklaring gesê.

"Ons vra alle Suid-Afrikaners om Tata op Kersdag in hul gedagtes te hou by elke plek van aanbidding en ontspanning en regdeur die feestyd," het pres. Jacob Zuma in 'n verklaring gesê.
 
"Ons nooi ook alle vredeliewende mense van regoor die wêreld om vir hom te bid. Hy is 'n vurige vegter en sal met ons ondersteuning herstel."

Die ikoniese leier, wat al byna drie weke in die hospitaal is, reageer goed op behandeling.

Die 94-jarige Mandela is op 8 Desember per helikopter vanaf Qunu in die Oos-Kaap na Pretoria gevlieg. Hy is behandel vir 'n herhalende longinfeksie en galstene.

Dit is die langste wat die voormalige leier in die hospitaal is sedert hy meer as twee dekades gelede uit die tronk vrygelaat is.

Pres. Jacob Zuma het die ikoniese leier Saterdag in die hospitaal besoek en het Suid-Afrikaners gevra om vir Mandela te bid.
      
– Volg Nuus24 op Twitter
SAPA
Lees meer oor:    nelson mandela
«Terug