Nuus24

‘Regte moenie lei tot misdaad’

Deur: Alicestine October 2012-03-22 09:00
Kaapstad – Suid-Afrikaners moenie hul regte met misdadige gedrag verwar nie, is Woensdag op Menseregtedag gesê met verwysing na die oproer vandeesweek op Grabouw.

Eerw. Kenneth Meshoe, ACDP-leier, het gesê Suid-Afrikaners moet leer dat hul regte met verantwoordelikhede gepaardgaan.

“Die regte van ander mense moet nooit vergeet word in die uitoefening van jou eie regte nie.

“Mense op Grabouw wat vandeesweek hul reg om te betoog uitgeoefen het, het byvoorbeeld nie die reg om ander se eiendom te vandaliseer nie. Ons moenie ons regte verwar met misdadige gedrag nie.”

Senior lede van Cope en die IVP het op hul beurt ’n behoefte aan bewusmaking onder en opvoeding van Suid-Afrikaners oor menseregte beklemtoon te midde van oproerigheid in Sharpeville.

Inwoners van Sharpeville het betoog omdat die Menseregtedag-vieringe vanjaar in Kliptown eerder as Sharpeville gehou is.

Mosiuoa Lekota, Cope-leier, het gesê dit is elke politieke party se plig om mense bewus te maak dat menseregte nie net oor die Sharpeville- of Lan­ga-menseslagtings gaan nie.

Ook Ben Skosana, IVP-LP, het gesê opvoedingsprogramme is nodig om Suid-Afrikaners te leer oor die oorsprong en sosio-ekonomiese implikasies van menseregte.

Die ANC-vroueliga het daarop gewys dat talle vroue, ondanks die Grondwet, daagliks aan diskriminasie onderwerp word.

“Die reg op menswaardigheid word verskans in die Grondwet, maar ons moet onsself afvra waar die menswaardigheid is wanneer ’n vrou seksueel aangerand word omdat sy ’n mini-romp dra. Waar is die menswaardigheid wanneer vroue nie die regte kan geniet waarop hulle ook geregtig is nie?”

Sapa berig Pregs Govender, kommissaris van die Menseregte-kommissie, het Woensdag in Kliptown gesê die grootste skending van menseregte vandag is armoede.

Govender het vroeër aan die Kaapstadse Persklub gesê die feit dat 16 miljoen mense nie toegang tot basiese sanitasie het nie, is ’n aanklag teen Suid-Afrika se menseregte-rekord.

– Volg Nuus24 op Twitter.
Die Burger
Lees meer oor:    misdaad menseregte
«Terug