Du Plessis, ’n dokter, trou vandag met dr. Ronél Malherbe van Krugersdorp. Die twee het mekaar ontmoet toe hulle medies aan die Universiteit van die Vrystaat studeer het.
Sowat 600 gaste, onder meer byna die hele Springbokspan en die nuwe Bok-afrigter, Heyneke Meyer, woon die troue by.
Spelers soos Victor Matfield, Juan Smith, Pierre Spies, Heinrich Brüssow, die hele Haaie-span en hul afrigter, John Plumtree, sal ook daar wees.
Lede van die Concerned Citizens het vandag ’n vergadering, waarna hulle die dorp op horings wil neem.
Die ontevrede inwoners wil al die belangstelling vir die troue inspan om hul griewe aan die groot klok te hang.
Inwoners het kort ná Nuwejaar onrus, brandstigting en verwoesting gesaai
Hulle is ontevrede met hul ANC-raadslid, David Lengoabala. Hy is na bewering betrokke by tenderkonkelary, is agterstallig met betalings van munisipale heffings op sy huise en word beskuldig van baantjies vir ANC-boeties.
Die openbare beskermer, adv. Tuli Madonsela, het intussen begin met ’n ondersoek na Lengoabala en tender-ongerymdhede in die Dilhabeng-munisipaliteit.
Lebohang Mokoena van die Concerned Citizens het gesê hulle is moeg vir Lengoabala “wat maak asof Clarens aan hom behoort”.
Lengoabala het op sy beurt gesê bewerings teen hom is kwaadwillige politiekery.
Du Plessis kon teen druktyd nie vir kommentaar bereik word nie.
– Volg Nuus24 op Twitter