Dít volg nadat die atleet deur 'n ander vrou van verkragting beskuldig is.
Pinki Pramanik het na bewering 'n vrou, saam met wie sy in die oostelike staat van Wes-Bengaal woon, verkrag. Die vrou beweer Pramanik is 'n man wat beloof het om met haar te trou, maar later geweier het.
"Ons het Pramanik in hegtenis geneem nadat 'n vrou 'n saak van verkragting aanhangig gemaak het," het adj.komm. Subrata Bandyopadhyay aan die Indian Express gesê.
Bandyopadhyay het gesê die klaagster beweer die atleet is 'n man en dat hulle die afgelope paar maande saam woon.
"Ons het die hof genader vir toestemming om mediese toetse te doen om die geslag van die atleet vas te stel en dié versoek is toegestaan."
Pramanik was volgens berigte glo huiwerig om die toetse te doen.
"Ek het verskeie toetse in my loopbaan as atleet ondergaan. Hoekom moet ek instem om nóg belaglike toetse te doen?" het die 26-jarige Pramanik gesê.
Die Atletiekfederasie van Indië wou nie kommentaar lewer nie.
"Ons kan nie kommentaar lewer oor die kwessie totdat ons meer besonderhede het en die amptelike verslae gesien het nie. Ons kantoor sal later reageer," het Manohar Lal Dogra aan AP gesê.
– Volg Nuus24 op Twitter