Soos wat verwag is, het aanklaers die 33-jarige regse ekstremis onder ‘n paragraaf in Noorweë se teenterreur-wet aangekla wat verwys na gewelddadige dade wat daarop gemik is om sleutelfunksies van die regering te ontwrig of om vrees in die samelewing te versprei.
Breivik het erken dat hy die aanvalle op 22 Julie geloods het, maar ontken kriminele skuld. Hy verwys na die slagoffers as “verraaiers” omdat hulle immigrasiebeleide aanvaar het wat hy beweer die oorsaak sal wees van Islamitiese kolonisering van Noorweë.
Agt mense is dood toe ‘n bom in Oslo ontplof het en nog 69 mense is dood in ‘n skietery op Utoya-eiland buite die hoofstad, waar die jeugliga van die Arbeidersparty ‘n jaarlikse somerkamp gehou het.
Die aanklaer Inga Bejer Engh het gesê 34 van die slagoffers by Utoya was tussen 14 en 17 jaar oud, 22 was tussen die ouderdomme van 18 en 20 en ses was tussen 21 en 25 jaar oud. Sewe slagoffers was ouer as 25.
Sy het bygevoeg dat 67 as gevolg van skietwonde dood is en twee is dood nadat hulle geval of verdrink het.
Altesaam 33 mense is deur koeëls beseer, maar het oorleef.
Die terreur-aanklagte het ‘n maksimum straf van 21 jaar in die tronk, maar aanklaers het aangedui dat hulle Breivik as kranksinnig sien en hulle sal aanvoer dat hy by ‘n psigiatriese inrigting, eerder as ‘n tronk, opgeneem word.
– Volg Nuus24 op Twitter