In Frankryk het ’n debat oor kastrasie vir kinderverkragters opnuut opgevlam nadat ’n veroordeelde kinderverkragter aangebied het om hom te laat kastreer.
Francis Evrard (63) is reeds agt keer aan seksuele misdrywe – waarvan drie van kinderverkragting – skuldig bevind. Hy staan in Douai in die noorde van Frankryk tereg weens die beweerde ontvoering en verkragting van ’n vyfjarige seun.
Die beweerde misdaad is in 2007 gepleeg, net ses weke nadat hy uit die tronk vrygelaat is.
Hy het pas in die stad Caen 18 jaar van ’n vonnis van 27 jaar weens kinderverkragting uitgedien. Sulke vervroegde vrylatings was destyds algemeen.
’n Storm van verontwaardiging het oor Frankryk gespoel toe dit bekend geword het dat die gevangenisdokters by sy vrylating die ereksiepil Viagra aan hom voorgeskryf het.
Dít ondanks ’n verslag van ’n sielkundige wat gewaarsku het Evrard sal waarskynlik wéér seksmisdade pleeg.
Pres. Nicolas Sarkozy het destyds onmiddellik gereageer deur die stelsel van vervroegde vrylating te beperk.
In 2008 is ’n wet goedgekeur wat chemiese kastrasie – medisyne om die seksdrang te onderdruk – moontlik maak. Maar Evrard het nou ’n brief aan die president geskryf waarin hy aanbied dat sy testikels chirurgies verwyder word.
Dit sal ’n wetsverandering beteken, aangesien egte kastrasie onwettig in Frankryk is.
Michèle Alliot-Marie, minister van justisie, het te kenne gegee sy sal so iets oorweeg.
Evrard het skuld beken.
Hy het aangevoer hy is self as kind gemolesteer.
Mustafa Kocacurt, pa van Enis (nou sewe en ’n half jaar oud), sê Evrard probeer hom nou as ’n martelaar uitbeeld. “Die man is ’n lafaard en ’n pervert.”
–Beeld