Publications
Partners
Gesprekke oor die lewe: Die laaste gedagtes van I.L. de Villiers. Uitgewer: Lux Verbi. Prys: R150
In die “laaste gedagtes” van I.L. de Villiers, oudredakteur van Rapport en Sarie en ’n gewese predikant, betrek hy die leser by ’n deurlopende gesprek wat hy oor die lewe gevoer het. Hy het die kuns verstaan om in woorde gestalte te gee aan hoe ons steeds besin oor die misterie en uitdaging van ons daaglikse lewe.
Interessant is hoe De Villiers steeds deur sy nagelate woorde die vermoë het om iewers iets in jou menswees aan te roer. Hy het begaaf met woorde en die Woord omgegaan.
Postuum het drie publikasies van De Villiers verskyn, waarvan sy dagboek, Onder ewige vlerke (CUM Uitgewers) reeds verskeie herdrukke beleef het. Dit is in Engels vertaal en het ’n goeie indruk op die Amerikaanse mark gemaak.
Hierdie bundel bevat ’n samestelling van sy laaste preke by die NG gemeente Aasvoëlkop in Johannesburg. Die preke is getranskribeer van opnames. De Villiers het nooit formeel ’n preek uitgeskryf nie – eerder net aan die hand van enkele notas met die gemeente in gesprek getree.
Hierdie bundel is uiteindelik ’n besinnende nadenke oor hoe om aan die lewe en vandag inhoud en waarde te gee. Dis gesprekke oor die lewe waarin ons staan. Gesprekke wat so deur hom aangebied is dat dit juis ’n basis word van die steeds voortgaande gesprek oor die lewe en sy inhoud. Hy bied immers geen finale woord aan nie.
Hy was ’n wyd belese man wat gevoed is deur ’n ondersoekende gees wat woorde en begrippe intens bepeins het voordat hy dit op eiesoortige manier weer met nuwe aksente kon deurgee. Hieruit spreek sy gevoeligheid vir die woord, sy intense omgang met dié Woord en ook sy behoefte om in gesprek te bly – met God en sy medemens.
– Amanda Botha
In die “laaste gedagtes” van I.L. de Villiers, oudredakteur van Rapport en Sarie en ’n gewese predikant, betrek hy die leser by ’n deurlopende gesprek wat hy oor die lewe gevoer het. Hy het die kuns verstaan om in woorde gestalte te gee aan hoe ons steeds besin oor die misterie en uitdaging van ons daaglikse lewe.
Interessant is hoe De Villiers steeds deur sy nagelate woorde die vermoë het om iewers iets in jou menswees aan te roer. Hy het begaaf met woorde en die Woord omgegaan.
Postuum het drie publikasies van De Villiers verskyn, waarvan sy dagboek, Onder ewige vlerke (CUM Uitgewers) reeds verskeie herdrukke beleef het. Dit is in Engels vertaal en het ’n goeie indruk op die Amerikaanse mark gemaak.
Hierdie bundel bevat ’n samestelling van sy laaste preke by die NG gemeente Aasvoëlkop in Johannesburg. Die preke is getranskribeer van opnames. De Villiers het nooit formeel ’n preek uitgeskryf nie – eerder net aan die hand van enkele notas met die gemeente in gesprek getree.
Hierdie bundel is uiteindelik ’n besinnende nadenke oor hoe om aan die lewe en vandag inhoud en waarde te gee. Dis gesprekke oor die lewe waarin ons staan. Gesprekke wat so deur hom aangebied is dat dit juis ’n basis word van die steeds voortgaande gesprek oor die lewe en sy inhoud. Hy bied immers geen finale woord aan nie.
Hy was ’n wyd belese man wat gevoed is deur ’n ondersoekende gees wat woorde en begrippe intens bepeins het voordat hy dit op eiesoortige manier weer met nuwe aksente kon deurgee. Hieruit spreek sy gevoeligheid vir die woord, sy intense omgang met dié Woord en ook sy behoefte om in gesprek te bly – met God en sy medemens.
– Amanda Botha
