Dit is veral Hanlie Retief se gesels met dr. Blade Nzimande wat my getref het. Ek is werklik bly dat u ook die ander kant van hom aan ons kom wys het met dié onderhoud.
Tot nou toe het ek net van sy kommentaar gelees wat ’n negatiewe invloed het op my denke van hom. Ek is ’n bejaarde man wat so deur die media om die bos gelei is in my jong dae dat ek nie ’n opinie kon vorm oor wat om my aangaan nie.
U moet hierop voortbou. Al die mense in die regering het goeie en slegte punte. Al wat ons tot nou toe gevoer is, is meestal die negatiewe. Nié dat u moet ophou om ons ingelig te hou nie, maar u het ’n plig om dít wat positief is ook aan ons deur te gee.
Ek is nie ’n ANC-ondersteuner nie, en is bekommerd oor my land en die rigting waarin ons beweeg. Al wat ek aldag hoor, is ’n geteem van hoe sleg dit gaan, terwyl daar baie is om voor dankbaar te wees. Met artikels soos dié kan u help om ’n positiewe gesindheid te skep.