Almal is met reg bekommerd oor die hoë werkloosheid, veral onder die jeug.
Die grootste probleem is dat die ANC doelbewus, of deur ’n gebrek aan versiendheid, die ekonomie vernietig.
Hulle het geen begrip wat die woord “volhoubaar” beteken nie. Sal iemand tog asseblief soos vir ’n kindjie klein dit aan hulle verduidelik.
Dit kom al van hul struggle-dae af.
Dink maar aan “Liberation Before Education”(wat blykbaar tans nog ANC-strategie is) en vandag sit ons met onderwysers wat onbevoeg is.
Die meeste van die staatstoelaes waarvoor belastingbetalers moet opdok, is totaal onvolhoubaar.
Die grondkwessie is nóg ’n verdoemende bewys van die korttermyn-beleid vir oorlewing van die ANC – ’n tweede Zimbabwe is ongetwyfeld ons voorland.
Dit sal die ANC loon om vroegoggend na Hennie Maas se landbou-program op RSG te luister (as hulle dit sal verstaan). Die program maak dit baie duidelik dat boerdery vandag ’n komplekse besigheid is.
Voedselsekerheid is nie onderhandelbaar nie. Ek kan nie sien hoe “bestaansboerdery” genoeg kos op die tafel sal sit nie. Ek is oortuig dat daardie boere nog self kos sal moet aankoop.
Miskien moet kundiges bereken wat die opbrengs per hektaar is van die kommersiële boere teenoor dié van bestaansboerdery en dit wyd en pertinent publiseer.