En as die onnie ’n ateïs is?

Een aspek word misgekyk in die debat rakende geloof in skole: die onderwysers. Die norm in staatskole, veral Afrikaanse skole, is dat die skool-etos gegrond word op Christelike beginsels soos besluit deur die skool se beheerliggaam. Die onderwysers het g’n keuse in die saak nie.

Baie nie-gelowige onderwysers en onderwysers wat ’n ander geloof as Christenskap aanhang, maak dit selde bekend in hul werkplek.

Die Grondwet sê daar mag nie op grond van ras, geslag of geloof gediskrimineer word nie. Dus kan die onderwyser se geloof nie ’n faktor wees as dit by aanstelling kom nie. Maar onderwysers voel genoodsaak om dié aspek van hulself weg te steek. As ateïs ervaar ek daagliks hoe my kollegas in die personeelkamer praat oor die goddeloses. Dink jou in hoe Christelike ouers op die skoolhoof sal toesak as hulle moes uitvind ’n ateïs gee daagliks vir hul kind skool!