Wanneer gaan regerings oor die wêreld heen die lig sien? Daar is geen manier waarop enige polisiemag mense kan verhoed om te doen wat hulle wil doen nie.
Om sekere aktiwiteite te verbied, dien net om daardie bedrywighede ondergronds te dryf. Tydens die 1920’s het die Amerikaners probeer om drank te verbied. Al wat hulle reggekry het, was om die volmaakte teelaarde vir die Mafia te skep.
As enige individu enige plek in die wêreld dwelms wil gebruik (of dit nou sigarette, drank, heroïen of tik is), gaan hy of sy 'n manier kry om daardie middels in die hande te kry.
Deur die middels onwettig te maak skep ons net 'n kunsmatige mark vir bendes en finansier ons die bendes se bedrywighede.
Maak alle dwelms wettig. Gaan koop jou tik by die kafee op die hoek. Dan is daar geen bakleiery daaroor nie en niemand hoef geskiet te word.
Die dwelms sal ook heelwat goedkoper wees, want daar sal geen risiko by die verspreiding betrokke wees nie.
Die feit van die saak is: As enige persoon hom- of haarself wil vernietig, dan sal hy of sy dit doen. Dis sulke mense se individuele keuse.
As jy jou lewe wil opmors, doen dit.
Maar dan sal die res van die gemeenskap nie die prys vir jou onnoselheid hoef te betaal nie.
Maar dit is seker 'n te logiese argument vir politici om te verstaan.