Ek was 14 jaar lank lid van die veiligheidspolisie. Toe ek in 1992 in Johannesburg gestasioneer was, het ek ’n afspraak gemaak met genl. Piet Viljoen by die veiligheidshoofkantoor in Pretoria. Ek wou praat oor die aktiwiteite van die De Kock-span ná klagtes van verskeie
takbevelvoerders wat onder my bevel in die Oos-Rand gedien het. Viljoen het my weggejaag en gesê om nie hoofkantoor se werkwyse te bevraagteken nie. De Kock-hulle het onder die direkte bevel van hoofkantoor gewerk. ’n Ruk later is ek deur genl. Johan le Roux na Potchefstroom verplaas sonder enige verduideliking.
Ek het in 1993 op ouderdom 52 my ontslag geneem. Ek was nie bereid om onder súlke generaals te dien nie.
Vandag geniet hulle hul vet pensioene saam met sekere politici wat ook te lafhartig was om hul aandeel in De Kock se vergrype te erken. Mag hulle boet vir hul dade en die vernietiging van talle polisieloopbane en -gesinne destyds.