Ons werkgewer het in daardie stadium vir 22 van ons werkers op sy plaas in die Bloemhof-distrik aansoek gedoen en met groot genoeë het ons elkeen 430 Welkom Yizani-aandele gekry teen R10,00 elk. Ons was so opgewonde, nou het ons ook iets besit wat kan groei. Ons het gesien hoe ons lewensomstandighede sou kon verbeter – ek het twee slim kinders wat kan gaan leer.
Op 9 Desember 2013 was hierdie Welkom Yizani-aandele van ons R9,00 werd, dus ná sewe jaar R1 minder as wat ons betaal het.
Waarom het Media24 vir ons ’n waardelose aandeel aangebied?
In dieselfde tydperk het Naspers se aandeelprys tot meer as R1 000 gegroei.
Media24 reageer: Naspers se aandeelprys affekteer nie Welkom Yizani-aandele nie. Toe die aandele-aanbod gemaak is, was Media24 op ’n groeipad. Handelsomstandighede van onder meer koerante het intussen drasties verander, onder meer weens die onvoorsiene ekonomiese ineenstorting van 2008.
Sedertdien het Naspers, in belang van Welkom Yizani-aandeelhouers, R330 miljoen se aandeelhouerskuld afgeskryf, die rentekoers verlaag, en skuld geherstruktureer. Media24 het koste gesny en nuwe inkomstebronne word voortdurend gesoek. Media24 is ondubbelsinnig daarop gefokus om waarde vir die aandeelhouers te skep.