Tipies van Pauw, Max du Preez, Piet Croucamp en hul geesgenote verswyg of verdraai hulle feite of maak gebruik van propaganda, persepsies of growwe veralgemenings. Hierdie berig is ’n sprekende voorbeeld daarvan.
Genl. (Johan) Le Roux was ’n luitenant-kolonel en afdelingsbevelvoerder van die Veiligheidstak in Krugersdorp toe die Japie Maponya-voorval in 1985 plaasgevind het, nie ’n generaal nie.
Die voorval in Lesotho het op 19 Desember 1985 plaasgevind toe De Kock en ander Vlakplaas-lede ses lede van Umkhonto we Sizwe doodgeskiet het, asook die twee vroue in hul geselskap.
Volgens getuienis tydens die amnestieverhoor was dié MK-lede op die punt om die republiek binne te sypel om dood en verwoesting te saai.
Medaljes vir dapperheid is gedurende 1986 op aanbeveling van die kommissaris, genl. Johann Coetzee, deur die minister van wet en orde, Louis le Grange, ná oorleg met staatspresident P.W. Botha aan De Kock en ander lede van die Vlakplaas-eenheid toegeken.
Hulle het ook amnestie vir die dood van die MK-lede gekry. Ek het eers op 1 Januarie 1990 kommissaris geword.
De Kock is nooit vir die Lesotho-voorval vervolg nie. Talle lewens is danksy dié optrede gespaar. Daar is geen medaljes aan De Kock toegeken ten opsigte van enige voorval waarvoor hy tot gevangenisstraf gevonnis is nie.
In al die gevalle waar hy wel met medaljes vereer is, was die optrede suiwer op die bestryding van terreur en geweld gerig. Daar is geen feite beskikbaar dat De Kock in opdrag van ’n meerdere opgetree het in die gevalle waar hy tot gevangenisstraf gevonnis is nie.