Rapport maak hom skuldig aan eensydige joernalistiek. Die Palestyne word grafies uitgebeeld as die slagoffers van ’n bose Israel, sonder die nodige konteks.
Die volgende feite word geensins in ag geneem nie:
1. Israel het in 2005 aan Gaza onttrek waarna Hamas, ’n radikale Islamitiese organisasie, beheer oorgeneem het nadat Fatah, die meer gematigde Palestynse organisasie, verdryf is;
2. Hamas se handves erken Israel nie as ’n staat nie en beywer hom vir sy vernietiging. Dis hoekom Hamas vuurpyle op Israel afvuur, hoewel Israel ten volle aan Gaza onttrek het;
3. Honderde ondergrondse tonnels deurkruis Gaza om onder meer wapens in te smokkel en om Israel binne te sypel vir terreurdade. Daar is selfs ondergrondse militêre beheersentrums.
Gold sê in sy artikel daar is nie ’n enkele bomskuiling in Gaza nie;
4. Wapens word geberg en missiel-lanseerplatforms word naby skole, hospitale en ander openbare geboue geplaas;
5. Die Israeli-weermag versprei pamflette om burgerlikes te waarsku om pad te gee vóór ’n aanval. Vergelyk dit met die vuurpyle wat sonder waarskuwing op Israel afgevuur word; en
6. Die huidige vredesamesprekings het skipbreuk gely toe Fatah besluit het om ’n koalisie met Hamas te sluit, wel wetende dat Hamas Israel nooit sal erken nie. Die gevolg van die koalisie was die ontvoering van en moord op drie Israeli-jeugdiges.
Daar is nog talle voorbeelde. Die feit wat deur die media geïgnoreer word is dat Hamas die konflik begin het deur die voortdurende afvuur van vuurpyle op Israel, ’n soewereine staat.
Sal enige ander land dit duld?