Mense vergeet dat dié fyn dame aanskou het hoe Oscar onmenslik verniel is deur die “Pitbull” (Gerrie Nel). Dié koerant het ook verwys na Oscar in die kake van die “Pitbull” met gepaardgaande spotprente.
’n Kanadese regsfirma het pas Lois se vraag aan Nel in perspektief geplaas deur die saak te beskryf as “onbillik en gekenmerk deur wangedrag deur die aanklaer”. Hulle voeg by dat skynbaar sterk skuldigbevindings in Kanada al tersyde gestel is oor baie minder “beledigende ondervraging” as dié van Nel.
Dié regsopinie is van belang omdat Suid-Afrika, soos Kanada, ’n grondwetlike staat is waar menseregte, ook ’n beskuldigde s’n, beskerm moet word.
En ons Grondwet is op Kanada s’n geskoei.
Ons mense is met reg kwaad vir die vlak van misdaad in ons land, maar dis tragies dat een individu en sy familie nou die weerligafleier word in ’n skou-saak wat ver verwyder is van die werklikheid in ons howe.
Niemand ontken dat dit ’n groot tragedie is nie: ’n Belowende jong lewe is beëindig en Oscar se lewe sal nooit weer dieselfde wees nie. Maar ’n beskuldigde bly ’n mens met regte en verdien menswaardige behandeling.
Dis tragies dat buitelanders, soos dié Kanadese regsfirma en ander, die growwe tekortkominge in die aanbieding van die staat se saak ontbloot, terwyl baie van ons eie mense hul oë sluit – of erger nog, luid applous lewer.