Twee van die bedankings het my na aan trane gehad. Ek het dié wenners tromp-op geloop en hul e-posadresse gevra sodat hulle hul bedankings vir my kon stuur. Hier is dit:
Sisca Julius, beste jong skrywer in die land, vir die tweede agtereenvolgende jaar: “Ons skrywers se werk is om diep en hard seer te kry en diep gelukkig te wees, en om mense te vertel van dit.”
Dominique Botha, wenner van die Eugène Maraisprys vir letterkunde: “Om in die naam van Eugène Marais ’n prys te ontvang is ’n blommekrans uit ’n droom wat ek nooit durf droom het nie. Hierdie verslete prins is ’n eeu gelede met ’n heuningvoël- roepstem teruggelok deur versengde provinsies, om in die kaal takke van ’n dialek ’n korf oop te breek. Sy woorde het op versoete vleuels die veld verse aangedra, wat deur die jare vermenigvuldig het oor ver verlate vlaktes en die dieptes van die see...”