Ek is so verlig dat Paul Colditz bedank het uit die UV-raad. Daar is nou een minder mens in die raad van wie se optrede ek my hoef te distansieer, veral tydens Konvokasie-vergaderings.
Dis jammer dat Volksblad en Rapport steeds ’n eksklusiewe platform bied vir die verkrampte denke van diegene wat steeds poog om die transformasie-proses aan die UV te ontspoor. Almal wat by die UV werk, moet verantwoordbaar gehou word. Nie net die bestuur nie, maar ook die stilswyende raad en die konserwatiewe Konvokasie-kliek.
Mense wat gereeld in die media aangehaal word rakende UV-sake, soos Paul Colditz en Willem Theron, is nie verteenwoordigend van die meerderheid Kovsie-alumni nie. Inteendeel, hulle verteenwoordig ’n by-die-dag-krimpende minderheid.
Die retoriek en strategie is bekend: Probeer ontslae raak van die rektor en koop só nog ’n bietjie tyd om te probeer om die UV wit, Afrikaans en Christelik te hou. Mag die alumni wys stem en nie weer ’n Afrikaner wat bang is vir transformasie kies om hulle te verteenwoordig op die raad nie.
Daar is baie Afrikaners wat hulle beywer vir betekenisvolle transformasie by die UV. Om van nóg ’n rektor ontslae te raak, gaan ons nie stop nie.