In “Drie wyses dink tesame oor evolusie Weekliks, 14 September), deel Chris Jones klappe uit teenoor onder meer ds. Koot Vorster, asook die res van ons wat “nooit bemagtig is met kritiese denkvermoëns” nie omrede ons “baie lank onkundig gehou is oor die evolusieproses”.
Ek het destyds ’n lesing van ds. Vorster oor geloof en evolusie bygewoon. Vorster se omskrywing van evolusie verskil blykbaar van wat Jones daarvolgens verstaan. Die “drie wyses”’ gee geen aanduiding of hulle van Darwinisme, Dawkinisme, Lamarckisme, neo-Darwinisme, mikro-evolusie, meso-evolusie, of makro-evolusie praat nie.
Tensy “wyse” mense hul vertrekpunte en definisies deeglik omskryf, is sinvolle bespreking onmoontlik. Jones haak vas by Genesis 1 tot 11, terwyl Vorster immers tot Eksodus 20 gevorder het en die vierde gebod aanhaal wat “skepping in ses dae” beklemtoon.
Of glo Jones nie soos Vorster in die tien gebooie, of dat God dit met sy vinger geskryf het nie? Is die vierde gebod ook maar net gegrond op ’n “interpretasie-feetjieverhaal”?