Só sê Sorika Olivier, ’n Suid-Afrikaanse onderwyseres op die Suid-Koreaanse eiland Jindo, oor verlede Woensdag se veerbootramp waarin vermoedelik minstens 200 hoërskoolleerlinge omgekom het.
Teen druktyd Saterdag is die lyke van net 32 passasiers van die veerboot Sewol gevind, met 270 wat steeds vermis word.
Die boot het 476 mense aan boord gehad, waarvan 174 gered is.
Daar word vermoed die vermiste passasiers is steeds in die veerboot vasgekeer.
Die meeste van die passasiers was leerlinge aan die Danwon-hoërskool in die buurt Ansan in Seoel.
Hulle was op pad na ’n gewilde vakansie-eiland in die gebied.
Die boot se kaptein, Lee Joon-Soeok, is gisteroggend saam met twee bemanningslede in hegtenis geneem.
Lee het aan die media laat blyk hy wou nie ’n ontruimingsbevel gee nadat die veerboot omgeslaan het nie omdat daar geen reddingsbote in die omgewing was nie en omdat die water yskoud was.
Honderde passasiers het in hul sitplekke bly sit terwyl die boot gesink het.
Kang Min-Kyu, die skool se adjunkhoof wat die ramp oorleef het, is Vrydag dood aangetref nadat hy homself na alle aanduidings aan ’n boom opgehang het.
Modderige water en sterk seestrome het die soektog na vermiste kinders tot dusver uiters moeilik gemaak.
Olivier, wat al vier jaar in die land bly en Engels gee, sê Woensdag het soos enige normale weekdag begin.
“Ek was besig om vir my gr. 3-leerlinge werkwoorde te leer toe die aanhoudende sirenes van ambulanse almal ontstig het.”
Daar het ook etlike helikopters verby begin vlieg, sê Olivier.
Dit het gou duidelik geword die noodvoertuie en -helikopters was op pad na die Paengmok-hawe, wat deur die stad se maritieme polisiediens gebruik word.
Die bootramp het sowat 90 km van die eiland Jindo gebeur.
“Ons is net 11 buitelanders op die eiland.
“Ons het besluit ons wil iets doen vir die dorp en die betrokke ouers en skoolkinders,” sê Olivier.
Sy en die ander buitelanders het geld ingesamel om pakkies kitsnoedels, bottels water, sakkies kitskoffie, sokkies, tandeborsels en tandepasta te koop vir die naasbestaandes wat sedert die ongeluk by die hawe staan en wag vir nuus oor hul vermiste geliefdes.
“Die atmosfeer by die hawe is ontstellend en somber.
“Almal sit of lê in tente in die donker en kyk na nuus wat die afgelope twee dae net dieselfde beelde oor en oor uitsaai,” sê Olivier.
Bykomende beriggewing deur Reuters en Sapa-AFP