En ná dese sal ’n paar rock-sangers hom seker aan die strot wil gryp: Hy sê rockmusiek verkoop nie, popmusiek wel.
Die musikant se handboek gee aan aspirantsangers en -musikante wenke oor hoe om ’n loopbaan op koers te kry.
Daar is wenke oor bemarking op sosiale media, hoe om jou woorde te tel as ’n “gevaarlike” vermaakjoernalis ’n onderhoud voer, en selfs hoe om jou stem te verseker.
“Deur dié lesse toe te pas kan ’n sanger derduisende rande spaar,” sê Louw.
“En met die liedjieskryf-oefening kan ons dalk duisende nuwe Afrikaanse liedjieskrywers ontmoet. Dalk ’n nuwe jong Afrikaanse Bob Dylan of Bruce Springsteen?”
Steve Hofmeyr, Jack Parow en Nicholis Louw is van die sangers wat ’n bydrae gelewer het. Nicholis vertel onder meer van sy handelsmerk en waarom hy altyd daardie vuur-en-vlam-skoene dra, en Hofmeyr oor hoe om jouself as handelsmerk te vestig.
“Dit was harde werk om die boek te skryf, maar ek is een van daardie musikante wat geen vyande het nie en ek kon onderhoude met almal vir die boek voer.”
Louw sê hy het ’n harde pad geloop om te kom waar hy is, selfs honger gely. Met die boek wil hy die pad makliker maak vir opkomende sangers.
Hy sê hy wil homself nie ’n skrywer noem nie. “Ek lees nie eens storieboeke nie. Ek dink ek is ’n gebore liedjieskrywer. Dít is my talent.
“Dit was vir my die moeilikste om oor myself en my eie geskiedenis in die musiekbedryf te skryf. My broer se dood was die rede waarom ek begin musiek maak het. Die ander hoofstukke is baie loopbaangerig.”
* Die musikant se handboek sal in Oktober op die winkelrakke en op Kalahari.com wees.