DeMorgenzon is lankal bekend oor wie sy eienaars is: Wendy Appelbaum was in 2011 in die nuus toe sy die slagoffer van ’n bedrieglike veiling vir ’n wynplaas van R55 miljoen geword het; en haar man, Hylton, het die radiostasie Classic FM in 1997 begin.
Die Bach, Albinoni, Handel, Haydn en Mozart wat nou dag en nag uit tien luidsprekers oor die wingerde stroom, kombineer dus die egpaar se liefde vir wyn en musiek. Selfs reeds gebottelde wyn “luister” saam.
Hylton het die idee in 2009 gekry en sedertdien sien hulle meetbare resultate.
“Die wingerde bot stadiger en groei meer egalig, die druiwe word effens stadiger ryp én die suikervlakke in die druiwe is laer sedert ons die musiek begin speel het,” sê Hylton.
“Ons kan regtig die uitwerking van die musiek sien. Dit was ook interessant om op te let dat die blomme wat onder die wingerde geplant is, nou vinniger groei sedert ons die musiek speel.”
Hy het nog altyd ’n belangstelling in die uitwerking van musiek en klankgolwe op plantegroei gehad.
DeMorgenzon het op barok- en klassieke musiek besluit oor die “wiskundige ritme” van die musiek.
“Ons het die musiek begin speel met die gedagte dat as dit geen uitwerking op ons wingerde het nie, dit ten minste die werksomgewing sal verbeter,” sê Hylton.
Hulle het sommer van die begin af besluit om geen musiek met stemme te speel nie – deels om irritasie te voorkom en die bure rondom hulle in ag te neem.
Sekere musiekinstrumente kom ook nie in aanmerking nie.
“Jy wil nie in die middel van die nag wakker word en ’n opera hoor nie,” skerts Hylton.
Baie van die werknemers op die plaas het nooit gedink hulle sal van die musiek hou nie, maar hulle is nou mal daaroor, sê hy.
Het die druiwe dan ook ’n gunsteling-komponis? Hylton is onseker.
“As dit niks anders doen as om die omgewing te verbeter nie, is ek gelukkig.”