Dit kom skaars twee maande na dié vurige rooikop in ’n tydskrif gebieg het sy en haar man Ben-G van Niekerk se huwelik is op die rotse nadat hy haar verneuk het.
Angelique en Ben-G is nog nie geskei nie.
Hy het reeds ’n nuwe vrou in sy lewe en nou sê Angelique sy gaan nie elke aand by die huis sit nie.
Dit is waarom sy en Flip deesdae gereeld in mekaar se geselskap gesien word. Maar Angelique sê al het hulle “een aand ’n soentjie gedeel” is hulle eintlik net vriende.
Uiteters wat dié twee sowat twee weke gelede in die restaurant gesien het, sê die aktrise en die Bok het so vurig geraak “dat hulle eerder ’n slaapkamer moes kry”.
O nee, sê Angelique giggelend. “Dit was regtig net ’n soentjie. Ek weet ons moes seker nie in die restaurant gesoen het nie, maar dit het g’n naby die slaapkamer gedraai nie.
Ons het lekker gekuier en toe ’n bietjie gesoen. Dit was nie vreeslik ernstig nie.
“Ek is nou enkellopend en gaan beslis nie elke aand by die huis sit nie, maar ek is glad nie reg vir ’n vaste verhouding nie. Ek en Flip is regtig net vriende en daar is niks tussen ons nie.”
Angelique en Flip is al verskeie kere saam by kuierkroeë in Pretoria gesien.
Flip is verlede jaar geskei van sy vrou, Elode.
“Flip is baie sosiaal en Elode wou ’n huisman hê. Sy het baie met hom baklei as hy saam met sy spanmaats ’n bier gaan drink of sosiale geleenthede bygewoon het.
Flip het toe besluit om van haar te skei,” vertel ’n bron wat in die rugbykringe beweeg.
Gaan die aantreklike slot Flip van der Merwe Angelique se hart heel maak? Die twee het glo ’n soen in ’n restaurant gedeel. Foto: Christiaan Kotze