Publications
Partners
Soms herken sy “Lady of Grace” hom. Dan lag sy oopmond en wag vir ’n soen. Soms slaan sy toe soos ’n oester. Dan gaan sy terug na ’n wêreld waar daar geen pyn of seer is nie. En geen Lance nie.
Daar is ’n helder oomblik wanneer “Big Daddy” Lance James (75) “My Lady of Grace” of “Bus 18” vir haar sing. Elke aand sê hy vir haar nag, soos die afgelope 49 jaar, al slaap sy nie meer langs hom nie.
Alzheimer-siekte is sowat 15 jaar gelede by Val (77), Lance se vrou, gediagnoseer.
Hy sien haar bykans elke dag wanneer hy haar in ’n versorgingsoord in Randburg besoek.
Lance wou nooit daaroor praat nie, maar die afgelope week, met die verskyning van die biografie Keep It Country: The Life and Times of Country Legend Big Daddy, het hy sy hart oopgemaak.
“Ek was altyd ’n baie private mens,” sê Lance in sy huis in Randburg waar hy en Val 35 jaar lank ’n lewe gedeel het.
Hy het Val en hul twee dogters, Dionne en Chanelle, uit die openbare oog gehou.
Lance het sy Val in die lente van 1963 by ’n bushalte in Johannesburg gewaar.
Sy het op bus 18 geklim.
Destyds het hy in ’n orkes in die klub Gizelle gespeel.
“Ons het 21:00 begin en 02:00 opgehou. Ek kon dan eers in die vroeë oggendure vir ’n nooi gaan kuier.”
So wou hy een aand by ’n heel ander nooi gaan kuier. Met ’n bos blomme in die hand het hy om 02:30 aangeklop.
Die noodlot het ingegryp.
Val het die deur oopgemaak.
Toe Lance Brittanje toe wou gaan om aan sy loopbaan te werk, wou Val nie saam nie.
Laat in 1964 was hy ’n toerbusbestuurder toe hy en ’n groep studente in ’n sneeustorm in Frankryk vasval. Dit het hom laat besef hy moet terugkeer. Terug na Val toe.
Twee jaar nadat hy haar daardie eerste keer gesien het, is hulle getroud.
Lance het intussen roem verwerf. Hy het die hoofrol in die fliek Lindie vertolk en sy plate het platinumstatus bereik.
Dit het baie toere beteken. Val het die kinders grootgemaak.
“Daar was baie vroue, maar ek het Val nooit verneuk nie. Ek het nooit ‘countryster-afleiding’ gesoek nie,” sê hy.
So 15 jaar gelede het haar gedrag verander. “Ek het derduisende aan dokters en spesialiste bestee. Ek wou ’n wondermiddel soek om haar te help. Sy het haar spraak verloor. Ek wou haar net nie laat gaan nie.”
Sowat 18 maande gelede het Lance nie meer ’n keuse gehad nie. Hy het haar in ’n versorgingsoord gesit.
“Ek dink die Here hou haar lewend vir my,” sê Lance voordat in hy in sy bus klim, op pad na die volgende vertoning op die platteland waar hy sy liedjie sing: “Goodbye for now and I see you at the bus stop.”
* Keep It Country: The Life and Times of Country Legend Big Daddy deur Bill Jones is beskikbaar by billjonesteam.com en by Lance se vertonings.
Lance en Val op hul troudag in 1965.
Val en Lance in die 1980’s
Lance en sy gesin. Chanelle (links) en Dionne regs. Val het later haar blonde krulle bruin gekleur.
Lance James se biografie het die week verskyn.
Daar is ’n helder oomblik wanneer “Big Daddy” Lance James (75) “My Lady of Grace” of “Bus 18” vir haar sing. Elke aand sê hy vir haar nag, soos die afgelope 49 jaar, al slaap sy nie meer langs hom nie.
Alzheimer-siekte is sowat 15 jaar gelede by Val (77), Lance se vrou, gediagnoseer.
Hy sien haar bykans elke dag wanneer hy haar in ’n versorgingsoord in Randburg besoek.
Lance wou nooit daaroor praat nie, maar die afgelope week, met die verskyning van die biografie Keep It Country: The Life and Times of Country Legend Big Daddy, het hy sy hart oopgemaak.
“Ek was altyd ’n baie private mens,” sê Lance in sy huis in Randburg waar hy en Val 35 jaar lank ’n lewe gedeel het.
Hy het Val en hul twee dogters, Dionne en Chanelle, uit die openbare oog gehou.
Lance het sy Val in die lente van 1963 by ’n bushalte in Johannesburg gewaar.
Sy het op bus 18 geklim.
Destyds het hy in ’n orkes in die klub Gizelle gespeel.
“Ons het 21:00 begin en 02:00 opgehou. Ek kon dan eers in die vroeë oggendure vir ’n nooi gaan kuier.”
So wou hy een aand by ’n heel ander nooi gaan kuier. Met ’n bos blomme in die hand het hy om 02:30 aangeklop.
Die noodlot het ingegryp.
Val het die deur oopgemaak.
Toe Lance Brittanje toe wou gaan om aan sy loopbaan te werk, wou Val nie saam nie.
Laat in 1964 was hy ’n toerbusbestuurder toe hy en ’n groep studente in ’n sneeustorm in Frankryk vasval. Dit het hom laat besef hy moet terugkeer. Terug na Val toe.
Twee jaar nadat hy haar daardie eerste keer gesien het, is hulle getroud.
Lance het intussen roem verwerf. Hy het die hoofrol in die fliek Lindie vertolk en sy plate het platinumstatus bereik.
Dit het baie toere beteken. Val het die kinders grootgemaak.
“Daar was baie vroue, maar ek het Val nooit verneuk nie. Ek het nooit ‘countryster-afleiding’ gesoek nie,” sê hy.
So 15 jaar gelede het haar gedrag verander. “Ek het derduisende aan dokters en spesialiste bestee. Ek wou ’n wondermiddel soek om haar te help. Sy het haar spraak verloor. Ek wou haar net nie laat gaan nie.”
Sowat 18 maande gelede het Lance nie meer ’n keuse gehad nie. Hy het haar in ’n versorgingsoord gesit.
“Ek dink die Here hou haar lewend vir my,” sê Lance voordat in hy in sy bus klim, op pad na die volgende vertoning op die platteland waar hy sy liedjie sing: “Goodbye for now and I see you at the bus stop.”
* Keep It Country: The Life and Times of Country Legend Big Daddy deur Bill Jones is beskikbaar by billjonesteam.com en by Lance se vertonings.
Lance en Val op hul troudag in 1965.
Val en Lance in die 1980’s
Lance en sy gesin. Chanelle (links) en Dionne regs. Val het later haar blonde krulle bruin gekleur.
Lance James se biografie het die week verskyn.
