Teen Saterdagmiddag omstreeks 12:00 is daar reeds 318 Palestyne dood. Die meeste is burgerlikes, onder wie kinders. Sover bekend, is nog net twee Israeli’s dood, waarvan een ’n burgerlike is. Sedert 8 Julie is 395 Israelse burgers beseer teenoor sowat 2 000 Palestyne.
Tog het pres. Barack Obama van Amerika eergister vir Israel in die bres getree deur sy “sterk ondersteuning vir Israel se reg om homself te verdedig” te herbevestig.
“Geen nasie moet dit aanvaar dat vuurpyle oor sy grens gevuur word of dat terroriste tonnels na sy gebied bou nie,” het Obama gesê. Hy was “diep besorg oor die risiko van verdere, eskalerende geweld” en het Israel gevra om burgerlike sterftes te “minimaliseer”.
Die Israelse offensief is in weerwraak van vuurpylaanvalle uit die Gazastrook deur Hamas op Israelse teikens.
Nadat ’n vyf uur lange skietstaking eergister beëindig is toe ’n vuurpyl uit Gaza na Israel gevuur is, het Israel vier grondoperasies en 90 lugaanvalle geloods, berig die Verenigde Nasies (VN).
Die Israelse weermag het gister voortgegaan met die grondoperasie waarmee hy Donderdagaand die Gazastrook ingeval het, nadat dié gebied tien dae lank met vuurpyle gepeper is. Volgens die Israelse weermag het hy tot dié stap oorgegaan om tonnels uit te wis wat Hamas-militante wou gebruik om Israel binne te gaan. Maar berigte uit die Gazastrook dui daarop dat woongebiede, hospitale en ook joernaliste se kantore deurgeloop het.
AFP berig ’n man van Gazastad en ’n sesjarige kind van Beit Lahija, in die noorde van Gaza, het gisteroggend in lugaanvalle hier omgekom.
Dié sterftes is aangemeld kort nadat vyf lyke uit ’n huis in Khan Joenis, in die suide van Gaza, verwyder is ná ’n ander Israelse lugaanval.
Sky News het gisteroggend berig verteenwoordigers van Palestina en Israel het mekaar tydens ’n noodvergadering van die VN geblameer vir die voortslepende geweld.
Die VN het intussen aangekondig sy sekretaris-generaal, Ban Ki-moon, is op pad na die Midde-Ooste om ’n skietstaking te help bewerkstellig.
Verskeie wêreldleiers vra dat ’n skietstaking met Egipte se bemiddeling bereik word. Hamas is egter onwillig, tensy Israel onder meer Hamas-gevangenes vrylaat en toegangsbeperkings uit die Gazastrook ophef.
Volgens die VN skuil minstens 47 000 Palestyne in die Gazastrook by VN-vlugtelingsentrums.
In Suid-Afrika was daar die afgelope week in Kaapstad en Johannesburg groot betogings teen Israel se aanvalle.
’n Palestynse meisie wat uit haar huis ontruim moes word ná ’n Israelse grondoffensief wag saam met ander kinders in ’n klaskamer by ’n skool van die Verenigde Nasies in Rafah in die suidelike deel van die Gazastrook. Israelse magte het Saterdag hul grondoperasies voortgesit terwyl Palestynse militante nog vuurpyle na Israel afgevuur het. Die dodetal ná sowat twee weke se konflik is nou meer as 300. | Foto: REUTERS/Ibraheem Abu Mustafa