Dít alles vir die kans om ’n wêreldkampioen te lewer – in ploeg!
Ja, ploeg: Willie Ludik (38), ’n skaapboer van die plaas Middelplaats by Rouxville in die Vrystaat, vertrek binnekort na Bordeaux in Frankryk om Suid-Afrika vir die eerste keer op die wêreld-ploegkampioenskap te verteenwoordig.
Dit was by Nampo-park buite Bothaville waar Ludik se seldsame talente verlede jaar raakgesien is toe hy stof in die oë van gesoute ploeërs van oor die land heen geploeg het en as Suid-Afrika se ploegkoning aangewys is.
Nooit het dié nederige veeboer gedink hy sou saaiboere kon troef om danksy dié titel op 5 en 6 September vir die wêreld te gaan wys hoe reguit en egalig hy lyne met ’n ploeg kan kafdraf nie.
“Ek het kort voor die kompetisie twee biere gedrink, so dit het my seker rustig gehou,” skerts hy.
Hy bieg hy het nog net so twee of drie keer vir die wêreldkampioenskap, wat vanjaar vir die 61ste keer gehou word, geoefen.
Tog is hy verlede naweek na Vredenburg in die Wes-Kaap waar Roy Fuller, wat Zimbabwe al ’n paar keer op die wêreld-ploegkampioenskap verteenwoordig het, hom met sy ploegtegniek gehelp het. ’n Spesiale ploeg wat aan die wêreldkampioenskap-standaarde voldoen, is ook van Rouxville af per koerier hierheen vervoer sodat hy behoorlik kon oefen.
Hy voel gereed vir die uitdaging wat nou in Frankryk voorlê, maar is ’n bietjie senuagtig oor die taal wat hy nie verstaan nie.
“Ek is skaars Engels vaardig en sal dus maar op handgebare moet staatmaak.”
Hy het ook geen belangstelling aan die Franse kos, klere en parfuums daai kant nie.
“Ek wil gaan kyk hoe hul trekkers lyk en gaan leer hoe die manier wat hulle grond bewerk van ons verskil.”