Kasrils is woedend vir pres. Jacob Zuma oor die “korrupsieplaag” wat die ANC beduiwel – en hierin staan Nkandla sentraal.
Sy weersin eindig ook nie by Zuma nie. Dit is ook gerig op ’n “ongelooflik korrupte elite wat die ANC en SAKP uitverkoop het”.
“Jy kan mos nie wanneer jy na die verlede kyk net sê dis nou ons beurt om te eet noudat jy danksy die ANC aan die bewind is nie.
“Op die ANC-mashoof het altyd gestaan: ‘Diens aan al die mense en nie diens aan jouself nie.’
Etiek en moraliteit was voorop, asook die waardestelsel waarvolgens ons in die struggle grootgemaak is en die voorbeeld van ons voorgangers wat ons gevolg het. Dit was nie net die leiers nie, maar ook op voetsoolvlak,” sê Kasrils.
“Dit is wat ons voorgehou het aan ons mense, dat ons ’n stelsel omver kon werp wat gegrond was op uitbuiting en
rasse-oorheersing waar die minderheid die voorregte gehad het.
Dit was ’n stelsel wat ons gesê het korrup was, en ons sou dit vervang deur ’n beter Suid-Afrika vir almal in Madiba se termyn.
“Dié (huidige stand van sake) is dus skokkend. Die manier waarop almal die president se gunsteling wil wees en beloon wil word vir hul steun deur ’n minister gemaak te word of ’n lekker pos te kry, volg uit die soort korrupsie wat ons hier het,” meen Kasrils.
“Dit is gegrond op ’n waardestelsel en ’n mentaliteit dat die enigste manier van vorder is om jouself te verkoop, om transaksies vir jouself te sluit.
Ekonomiese vooruitgang en die voordele van swart ekonomiese bemagtiging is beperk tot ’n klein breukdeel van die samelewing.”
Is dit dan net Zuma se skuld?
“Mense sal jou vertel hy was ’n baie gewone ou, nie iemand wat blink motors en deftige klere gesoek het nie.”
Jy kon tog aan “al die verhoudings met vroue en die kinders” sien daar was “ambisie”.
Zuma het “baie drasties verander”.
“Hier is ’n man wat terugkom na Suid-Afrika (uit ballingskap), en dink net hoe bekommerd hy moes wees oor hoe hy vir al dié familielede gaan sorg.
En dan is daar al hierdie mense, kapitaliste, met geld in hul agtersak wat soos aasvoëls op die nuwe politieke leiers toesak.
“Party (leiers) was maar te gelukkig oor dié omhelsing, want dan hoef jy jou nie te bekommer oor die wolf by die deur, oor hoe jy die rekeninge gaan betaal, jou kinders opvoed, ’n huis kry vir jou vrouens en kinders nie.
“Daar is ’n elite wat ongelooflik korrup geword het, wat die mag oorgeneem het by (oudpres. Thabo) Mbeki en hom uitgeskop het, en sedertdien is dit afdraande.”