“Ek was maar nog altyd ’n petrolkop. Ek het nog nooit ball sense gehad nie, maar ek wil ’n stuurwiel tussen my hande hê en die wêreld plat spin,” sê Louw met ’n laggie.
Die sanger is soos ’n klein seuntjie wanneer hy oor sy nuwe stokperdjie praat, hy glimlag van oor tot oor.
Sowat twee jaar gelede het hy kennis gemaak met dié sportsoort toe hy as deel van ’n liefdadigheidsdag moes resies jaag.
“Ek was wild op daai baan en ek het nogal goed gedoen,” sê hy.
Die Legends-renmotors lyk ietwat ouwêrelds, byna soos ’n klassieke motor.
Maar dit kan binne 3,5 sekondes van 0 tot 100 km/h versnel, sê Louw.
“Ek was dadelik mal oor die karretjies. Hulle is cute en blitsvinnig!”
Liqui Moly, ’n maatskappy wat olie vir motors vervaardig, het vir hom ’n borgskap aangebied.
“Ek was só bly! Sulke goed gebeur nie.”
Hy het besluit om die kans aan te gryp, maar het vir hulle gesê hy wil eers vir ’n jaar oefen en homself voorberei.
“Ek het verlede jaar nie aan wedrenne deelgeneem nie. Ek het net geoefen.”
Nicholis het elke week, wanneer hy ’n dag kon inpas, sy vaardighede verbeter. In Brakpan. By Zwartkops. Die Midvaal-renbaan. Oral waar hy kon.
Hy het vir die eerste keer in April resies gejaag en was gister weer by ’n wedren by Rock Raceway in Brakpan.
Hy sê motorsport maak hom “kalm”. “Ek is nou baie bewus van veiligheid. En ek hoef nie op die openbare paaie te jaag nie, want ek jaag dit uit op die renbaan.”
Maar hy is nie van plan om die verhoog permanent vir die renbaan te verruil nie.
Hy is besig met ’n nuwe album, sy eerste sekulêre album in meer as drie jaar.
“Ek begin so 10:00 opneem en dan werk ek tot so 01:30 die volgende oggend.”
En sy vrou, Denise?
Hoe voel sy oor die blitsige stokperdjie?
“Sy is ook ’n adrenalien-junkie. Daar is bekommernisse, maar sy het nou die dag gesky-dive. Ons is al lank saam en verstaan mekaar. Daar is wedersydse respek en ek is lief vir haar soos sy is, en sy vir my. Ons wil mekaar nie verander nie.”