Duisende mense het gister in Ngcingwana, Dutywa, in die Oos-Kaap, saam met die broers gerou.
Mev. Mbeki, of MaMbeki soos sy genoem is, is verlede Saterdag in ’n hospitaal in Oos-Londen dood.
Sy is in die hospitaal opgeneem nadat sy asemhalingsprobleme ontwikkel het.
Pres. Jacob Zuma kon nie die begrafnis bywoon nie. Hy rus tuis nadat hy verlede week siek geword het.
Onder die rouklaers was Andrew Mlangeni, wat saam met Epainette se man, Govan, op Robbeneiland aangehou is.
Die EFF-leier Julius Malema, die Cosatu-baas Zwelinzima Vavi en die ANC se sekretaris-generaal, Gwede Mantashe, was ook daar.
MaMbeki se oorskot het net voor 07:00 by haar huis aangekom, waarna ’n bidritueel uitgevoer is.
Die polisie het ’n erewag gevorm toe haar bruin kis van haar huis na die markiestent gedra is.
Adj.pres. Cyril Ramaphosa het aan die begrafnisgangers gesê hy wil graag soos MaMbeki wees.
“Ons is hier om die lewe van ons moeder, tannie en gemeenskap-bouer te eer en te vier.
“Volgens my was sy werklik ’n goeie vrou wat haar lewe met grasie, vrede en nederigheid gelei het.”
’n Emosionele Fezeka Mabona, wat namens die Mbeki-familie gepraat het, het gesê hulle “laat gaan vir Mamma” ná ’n pynlike week.
Sy het vertel MaMbeki wou nie eet terwyl sy in die hospitaal was nie. “Ek het haar verklik (by Thabo) en hy het haar daaroor gekonfronteer.
“Mamma het vir Thabo gesê om nie na my te luister nie, want ek het net geskinder.
“Sy het nie van skinderbekke gehou nie,” het Mabona gesê.
Die gaste moes later as veiligheidsmaatreël die markiestent ontruim toe ’n baie sterk wind begin waai het.
MaMbeki is in die Dutywa-begraafplaas begrawe.