Nianell het dié besluit die afgelope week in ’n eksklusiewe onderhoud met Rapport bekend gemaak.
“Dit is nie ’n besluit wat ons oornag geneem het nie. Ons het jare eers daaraan probeer werk.
“Ek en my man is baie, baie lief vir mekaar. Ons sê dit nog steeds elke dag vir mekaar. Maar ons besef ons is jare lank al eintlik net goeie vriende. Daar is nie die ander konneksies wat in ’n gesonde huwelik moet wees nie,” sê sy.
Die sangeres, gebore as Sonia Nel in Namibië, en Thompson het ’n drieling wat verlede maand sewe geword het. Die egpaar het hulle reeds van die egskeiding vertel.
Volgens Nianell wil sy en Thompson die oorgang vir die kinders so maklik as moontlik maak. Hy bly tans steeds saam met hulle in die huis waar die kinders ook tuisonderrig ontvang. Die plan is dat Thompson in ’n stadium in ’n woonstel gaan intrek.
“In my oë is hy die beste pa in die hele wêreld,” sê Nianell. Daarom is hulle vasbeslote dat die kinders hulle albei elke dag sal sien.
Nianell was kort voor haar drieling se verjaardag Kaap toe. Op ’n foto saam met haar vriendinne dra sy nie meer haar trouring nie.
“Hierdie pynlike, maar ook genesende besluit het ons nie ligtelik geneem nie omdat ons ten volle bewus is van die vele uitdagings wat gepaardgaan met ’n egskeiding. Ons het egter besef ons het weg van mekaar gegroei en dat ons saamwees nie meer ons eenwees eer nie,” sê sy in ’n mediaverklaring oor die egskeiding.
Hulle was 17 jaar saam, waarvan hulle 14 jaar getroud was. In 2010 het hulle hul huweliksbeloftes by ’n romantiese seremonie herbevestig.
“Ek het baie lank my eie behoeftes opsy geskuif. Ek het deur die jare geleer om myself lief te hê. ’n Mens groei en nou weet ek: Ek is belangrik en dit wat ek nodig het, is ook belangrik,” sê sy.
Andrew besef hoe sy voel en “het ook vrede”, sê sy.
“Dit is ’n baie groot storm wat om my woed, maar dit is asof ek in die oog van die storm staan. Ek is steeds dankbaar. En binne-in my het ek steeds geloof en vrede,” sê sy.
Ná die drieling se geboorte, het Andrew voltyds as Nianell se bestuurder gewerk, deels sodat die gesin meer tyd saam kon deurbring. Hy is egter ’n paar maande gelede aangestel as hoofbestuurder van ’n maatskappy wat gespesialiseerde toerusting vir oogspesialiste verskaf.
“Met vrede in ons hart weet ons dat ons die beste besluit vir ons en ook vir ons pragtige kinders gemaak het. Wanneer ons gelukkig in onsself is, sal ons kinders ook gelukkig wees. Ons het deur die jare geleer dat om n goeie ouer te wees, n mens die beste “jy” moet wees wat jy kan wees. Ek en Andrew voel dat ons nie meer ons beste by mekaar kan wees nie,” het Nianell gesê.
Sy het gevra dat mense vir hulle sal bid “in hierdie teer tyd”.