City Press, susterkoerant van Rapport, verneem die ANC is bekommerd oor die skade wat die Nkandla-kwessie aanrig en sal Zuma aanraai om ’n deel van die geld wat by Nkandla bestee is, terug te betaal sodra Nathi Nhleko, minister van polisie, en die tesourie bepaal wat dié bedrag moet wees.
Die party hoop dít sal die openbare druk op Zuma verlig.
“Daar is ’n ernstige gesprek aan die gang oor hoe om Nkandla te bestuur. Daar is druk op hom (Zuma) om iets te betaal. Die president moet betaal.
“Ons moet duidelike en besliste stappe doen omdat die skade aan die ANC voortdurend na vore kom,” het ’n ANC-leier gister gesê.
Adv. Thuli Madonsela, openbare beskermer (OB), het Zuma in haar Nkandla-verslag beveel om “ ’n redelike persentasie van die koste van die veiligheidsmaatreëls te betaal, in samewerking met die tesourie en in ag genome die departement van openbare werke se toedelingsdokument”.
Die oorspronklike toedelingsdokument is in Maart 2011 deur Bheki Khanyile, bestuurder van openbare werke in Durban, saamgestel.
’n Memorandum wat Khanyile aan Gwen Mahlangu-Nkabinde, voormalige minister van openbare werke, gestuur het, raam Zuma se aandeel in die Nkandla-besteding is meer as R10,6 miljoen.
Zuma se gesondheid is in die nuus sedert hy in Junie ’n kabinetsvergadering weens nekpyne verlaat het en ’n week geneem het om te herstel.
Die afgelope week is gegis hy het Rusland eintlik om gesondheidsredes besoek. Sy enigste amptelike afspraak in ses dae was met pres. Wladimir Poetin. Hy het ook die grafte van Suid-Afrikaanse vryheidsvegters besoek. Luidens ’n verklaring van die regering sou hy benewens ander “laevlak-vergaderings” die res van die tyd rus.
Die Nkandla-skandaal oorheers die nuus sedert Madonsela se skerp brief rugbaar geword het waarin sy Zuma takel dat hy nie genoeg gereageer het op haar verslag nie.
Voorverlede week het die EFF ’n parlementêre sitting in chaos gedompel met eise dat Zuma die “geld moet terugbetaal”.
Ofskoon sommige ANC-leiers erken dat Zuma vir die party ’n las raak, het die meeste leiers aan City Press gesê hulle sal nie toelaat dat die EFF of Madonsela die omstandighede voorskryf waaronder Zuma sy amp verlaat nie, en daarom sal hulle hom verdedig.
’n ANC-LP het gesê: “Die EFF gebruik die verkeerde taktiek. Hulle is gefrustreerd dat hulle net 6% het en kan niks deur die Huis druk as ons dit teenstaan nie. Hul fokus op die president maak ons net nóg meer vasberade om hom te beskerm.”
“Dit gaan nie oor Zuma nie,” het ’n ander ANC-LP gesê. “Dit gaan daaroor om die organisasie en die amp te beskerm. Ons weet hy het baie skandale en probleme en natuurlik bekommer dit ons. Maar ons kan nie toelaat dat (Julius) Malema of Madonsela vir ons voorskryf nie.”
Stone Sizane, die ANC se hoofsweep, sê dit voel vir hom asof Malema en Madonsela ’n “persoonlike haat” vir Zuma in hulle dra.
“Enigiemand wat een individu teiken eerder as ANC-beleid, sal misluk.”
Baie ander voel ook so.
’n ANC-lid van die wetgewer in KwaZulu-Natal het gesê: “Daar is geen manier dat ons van Zuma ontslae sal raak nie. Vergeet daarvan. Nie een van die verslae wys dat hy self enigiets verkeerd gedoen het nie, so waarom moet hy bedank? Die verslae het hom kwytgeskeld. Laat hulle wat uitgewys is en die koste opgestoot het, die gevolge dra, nie die president nie. Hy het niks verkeerd gedoen nie.”
’n Senior lid van die ANC-jeugliga het gesê dit is in die belang van almal wat sover voordeel getrek het uit Zuma se bewind om hom in die amp te behou. Maar foutlyne in die party kan wys wanneer die party se nasionale algemene raad in die middel van volgende jaar weer vergader. Dít is waar Zuma se vyande hul eerste skuiwe sal kan maak.
In Gauteng word die messe egter reeds geslyp. Drie lede van die party se provinsiale uitvoerende komitee het aan City Press gesê Zuma moet bedank, of minstens sy Nkandla-skuld delg.