Só het Baleka Mbete, nasionale voorsitter van die ANC, gesê.
Mbete is by ’n media-ontbyt gevra of die ANC se topbestuur meen Zuma moet aanspreeklikheid aanvaar vir Nkandla.
Sy het gesê nee. “Die president het geen besluite geneem nie. Baie van die besluite was eerder ’n ongerief en is steeds ’n ongerief.
“Al die aandag is ook vir die familie ongemaklik.”
Mbete het gesê ondanks ’n verslag deur die openbare beskermer (OB) wat aanbeveel dat Zuma geld moet terugbetaal vir Nkandla-aanbouings, meen die ANC daar is “geen rede” hiervoor nie.
“In die Afrika-tradisie meng mens nie in met ’n man se kraal nie. Dis ’n heilige plek.”
Daar is boonop geen planne om op te tree teen Nathi Mthethwa, minister van polisie, weens sy rol in die Nkandla-debakel nie.
Mbete het ontken die ANC probeer nou die werk van ’n parlementêre ad hoc-komitee vertraag wat opdrag gekry het om die OB se Nkandla-verslag te ondersoek. Die ANC het nog nie die name van LP’s wat in dié komitee sal dien, ingestuur nie.
Dié vertraging kan die komitee met net enkele dae laat om sy ondersoek te doen en ’n verslag te skryf.