Maar twee seuns wat so vinnig ná mekaar hul opwagting gemaak het, laat die egpaar nou wéér oor die kwessie dink.
“Ons glo nou ’n bietjie daaraan,” skerts Van Jaarsveld vroeër die week by die bekendstelling van nóg ’n seisoen van die teaterproduksie Liefling.
Van Jaarsveld lyk moeg.
Sy groen oë skitter nie.
Ja, ouerskap is besig om hom “oud te maak”. “ ’n Mens kan ook net soveel oogdruppels ingooi. Ek is maar baie besig en die kinders slaap steeds nie deur nie. Dus slaap ons ook nie.
“Albei is nog in doeke, drink bottels en huil mekaar snags wakker. Ons staan partykeer tot agt keer per nag op.”
Hoewel Van Jaarsveld daarna smag om ’n dogtertjie te hê, wil hulle eers ’n bietjie wag.
“Ons wil nog baie kinders hê, maar nie nou nie.
“Ons soek eintlik ses. Ek droom van ’n huis vol kinders en as dit die Here se wil is, sal ons nog kinders hê.
“Ek is so bang die Here het vir ons nog kinders beplan en dan stop ons Sy plan.”
Hoe hou die toekomstige mamma van vele haar figuur so slank?
“Dit is ons geheim,” knipoog Van Jaarsveld.
Volgens Van Jaarsveld lyk dit nou al asof Sion en Leben in hul pappa en bekende tannie, Karlien, se musiekvoetspore gaan volg.
“Sion love die verhoog en ons hou baie konserte by ons huis.
“Dan moet ons (ek en Annatjie) stilsit en kyk en ons moet hande klap. Hy sing al self sy eie vreemde, maar mooi liedjies. Leben volg maar vir boetie.
“Hy skreeu agterna, maar hy skreeu darem op die noot.
“Leben het ’n baie diep stem. Dit klink of hy Theuns (Jordaan) se laaitie kan wees.”
Van Jaarsveld sê hulle sal graag hul kinders op die Kaapse platteland wil grootmaak. “Ek is in die Paarl gebore. Dit voel soos huis.”
Van Jaarsveld neem nou sy nuwe CD op. “Dit het nog nie ’n naam nie, maar behoort teen die einde van volgende maand op die rakke te wees.”