Só meen mediese en regsmediese kenners nadat twee pasiënte private hospitale die laaste week van mediese nalatigheid beskuldig het.
Rita du Plessis (83) het verlede maand onnodig ’n hartoperasie in die Mediclinic Kimberley ondergaan nadat twee spesialiste haar met ’n ander pasiënt verwar het, het Volksblad Woensdag berig.
Beeld het Donderdag berig oor Clouie Saayman, ’n babameisie wat op 28 weke gebore is en uiteindelik vier vingers verloor het terwyl sy in die Mediclinic Nelspruit versorg is.
Die Mediclinic Kimberley het Du Plessis om verskoning gevra vir die fout.
Die Mediclinic Nelspruit ontken egter dat die hospitaal of sy personeel nalatig was en hou vol Clouie se ouers was deeglik bewus van die “komplikasies wat geassosieer word met vroeggeboorte en die verlies van haar vingers”.
Dr. Hennie Pienaar, tesourier van die Suid-Afrikaanse Regsmediese Vereniging (SAMLS), sê Suid-Afrikaners met toegang tot private sorg flous hulself oor die gehalte van plaaslike private hospitale.
“In die openbare sektor is daar voorbeelde van fenomenale sorg, maar daar is ook baie swak sorg. Dieselfde geld die private sektor,” sê Pienaar.
Hy is ’n chirurg en senior dosent by die Universiteit van Pretoria (UP) se mediese fakulteit.
Pienaar meen een van die probleme wat sowel die private as die openbare gesondheidsektor kniehalter, ontstaan in die opleidingsfase.
“Dit wil voorkom of die meeste studente nie meer vir hulself wil dink nie. Daar is nie meer genoeg ondersoekende denke onder mediese studente nie,” sê Pienaar.
In ander gevalle beskik mediese dosente en opleiers self nie oor die nodige ervaring, kwalifikasies of vaardighede om medici op te lei nie, meen Pienaar.
’n Senior rolspeler in die plaaslike mediese bedryf wat anoniem wou bly, sê Suid-Afrikaners sal geskok wees as hulle van die data sien oor die gehalte van sorg in die private sektor.
“In die VSA is tussen 20% en 30% van alle mediese koste gekoppel aan komplikasies en newe-effekte wat uit mediese behandeling spruit. Ek sou nie verbaas wees as daardie syfers ook vir Suid-Afrika se private sektor geld nie,” sê hy.
Justin Malherbe, ’n prokureur by die regsfirma Norton Rose Fulbright wat medici en gesondheidsinstellings in regsmediese eise verteenwoordig, sê die aansienlike toename in eise vir mediese nalatigheid en wanpraktyke raak die openbare én private sektor. “Dit is deesdae nie ongewoon om eise teen dokters en hospitale van meer as R20 miljoen te sien nie,” sê Malherbe.
Ronald Bobroff, een van die land se voorste prokureurs wat pasiënte in mediese eise verteenwoordig, sê private hospitale is steeds heelwat beter as openbare hospitale.
Hy meen egter veral probleme met die verpleegkunde in die private sektor sorg vir ’n toename in mediese eise.
Rapport het verlede jaar berig eise vir mediese nalatigheid en wanpraktyke teen provinsiale gesondheidsdepartemente in 2012-’13 beloop R4 miljard, terwyl daar ’n verdere R8 miljard se onafgehandelde eise is.
Hoewel soortgelyke data vir die private sektor nie beskikbaar is nie, meen kenners die koers waarteen eise teen private medici en hospitale toegeneem het, geld ook dié sektor.