Toe sterf hulle sowat 66 miljoen jaar gelede uit.
Net ’n paar spesies het die massa-uitwissing oorleef en het intussen evolueer tot voëls, maar nou is 44 “lewende” en wetenskaplik korrekte dinosourusse vir ’n maand lank in Johannesburg te sien.
Die tentoonstelling open Vrydag in die Sandton-konferensiesentrum en verskuif daarna van 31 Julie tot 20 Augustus na die Kaapstad- Internasionale Konferensiesentrum (Kiks).
Besoekers sal teruggevoer word na die prehistoriese tyd toe dinosourusse geleef het.
Hulle sal tussen die brullende en bewegende diere oor ’n nagemaakte savanne met vulkane, watervalle en oerwoude kan rondloop.
Die lewensgrootte dinosourusse is volgens streng spesifikasies in samewerking met paleontoloë gemaak.
Hulle is in Suid-Amerika en China vervaardig en sommige weeg ’n ton. Die grootste is ’n Tyrannosaurus rex van 13 m.
Die tentoonstelling sluit ’n 3D-rolprentteater en ’n paleontologiese opgrawingsterrein in.
Die jonger besoekers kan selfs in ’n dinosourus-eier klim of op een van die diere se rug ry.
45 000 kaartjies is reeds verkoop.
* “Days of the Dinosaurs” word aangebied deur Huisgenoot, You en Drum in samewerking met Cell C. Kaartjies is by Computicket beskikbaar.
Kaartjies kos R140 (volwassenes) en R95 (kinders tot 18 jaar).
Dié twee T-Rexe is gisteroggend uit ’n reuse-houer gehaal en sal van Vrydag tot 20 Julie in die Sandton-konferensiesentrum ten toon gestel word. Foto’s: Denzil Maregele