Die sanger Anton Botha, wat bekend is om sy liedjie “Jakaranda”, het op die eerste dag van die kunstefees, wat in Julie in Mbombela (Nelspruit) gehou is, op die Hit Factory Records-verhoog opgetree.
Ná sy optrede het hy van die steil trappies wat na die verhoog gelei het, afgeklim. Sy voet het gegly en hy het met ’n harde slag geval.
Hy moes ’n chiropraktisyn twee keer besoek en het ook sy been beseer.
Sy kitaar, wat sowat R45 000 werd is, het saam met hom geval. “Ek kan nie meer die kitaar bespeel nie en wil dit nie graag afskryf nie. Ek wil net graag hê die Innibos-feesbestuur moet vir die skade betaal,” sê hy.
Andy Lubbe, feesbaas, sê hulle aanvaar volle verantwoordelikheid vir die voorval. “Ons het openbare aanspreeklikheidsversekering.
“Ons sal die eis instel en hulle sal dan die meriete van die voorval ondersoek en besluit of hulle betaal. Ek vertrou dit sal wel gebeur. Ons sal ons bes doen om Anton se skade tot so min as moontlik te beperk.”
Anton sê hy weet nie wie die verhoog opgerig het nie, maar die trappies was steil, hoewel “nie onstabiel nie”.
Lubbe meen hulle was nie nalatig nie. “Die trappe was redelik steil, maar al die ander kunstenaars en die tegnici het dit gebruik en niemand anders het geval nie.
“Ons het die trappe ná die voorval verander sodat dit minder steil is. Ek dink dit was bloot ’n ongeluk.”
Lubbe sê dit is die eerste keer in 11 jaar dat ’n sanger ná ’n optrede hier beseer is.
Anton Botha