Dié wat hom goed ken, sê hy klink selfs soos Steve.
Ja, dit is Steve se middelseun, Devon Hofmeyr (20), wat in pappa se voetspore wil volg en “ ’n baie goeie akteur wil word”.
Dit lyk asof sy droom gaan waar word. Devon het die afgelope week ’n rol in ’n Britse fliek losgeslaan. Hy kan nie veel daaroor sê nie, maar hy speel glo ’n bose karakter wat Steve se karakter in die rolprent Platteland mak laat lyk.
Armand Hofmeyr, Steve se oudste seun, het reeds lankal roem op die verhoog gaan soek.
Anders as sy bekende pa en halfbroer wil Devon nie sing nie. “Dit is my passie om ’n akteur te word – ’n goeie een.”
Hy basuin dit nie uit dat hy Steve se seun is nie, sê hy. “Mense het soms vreemde verwagtinge as hulle hoor dat jy Steve se seun is. Dit kan baie gevaarlik wees.”
Devon het ná skool ’n dramakursus gedoen en sy lektor het gemeen dat hy ’n natuurlike akteur is.
Volgens Devon is Steve sy leermeester. “Soms sit ons laataand en werk aan ’n draaiboek of ’n monoloog.
“Hy demonstreer vir my hoe dit gedoen moet word.”
Devon het onlangs by Model Management in Pretoria aangesluit. Toe sien Loui Fish, die voormalige sosiale vlinder, hom raak en “skielik het deure net links en regs begin oopgaan”.
Een van sy groot drome is om as akteur teenoor sy pa te speel. “Ek weet net nie wie die bad guy tussen ons twee gaan speel nie. Ek sien baie uit na daardie dag.”