Die afgelope week het Rapport se span deur meer as 200 aansoeke gesif om die tien wenners aan te wys.
Elkeen van die aansoeke was besonders, maar op die ou end gaan Monico Boshoff (21), Daniel Peter Adlam (25), Sheldon van Zyl (32), Trevor Vercellotti (42), Louis Barnard (40), Charlé Jacobs (19), Elizna van Staden (19), Chante Hendricks (19), Ria Prins (67) en Charlotte Noemdoe (46) die stel besoek en hul gesigte in die legendariese hermaak van die rolprent sien.
Hulle ontvang ook elk ’n kontantprys van R500 en ’n Kalahari.com-geskenkbewys ter waarde van R500 as wenners.
Prins het aanvanklik nie geweet wat is besig om te gebeur nie toe haar man haar een Sondag inlig dat sy iets moet gaan aantrek.
“Ek het hom gevra waarnatoe gaan ons en toe sê hy hy gaan ’n foto neem,” sê sy laggend.
“Ek het gedog julle sal al hierdie ou jongmensies kies,” sê Prins, wat onkant betrap was toe sy hoor sy is óók deel van die groep.
Sy onthou nog vir Jacques Rynhard toe Gavin van den Berg hom laat smeul het.
“Hy was so aantreklik.”
“Ag, my wêreld, ek dink ek sal dit gate uit geniet,” sê sy oor die geleentheid.
Jacobs gaan van Reddersburg in die Vrystaat af kom vir die geleentheid.
“Daai tipe ding gebeur mos altyd daar bo,” sê sy. Sy het ingeskryf, want daar was niks te verloor as sy dit nie gekry het nie. Haar ma het Vrydag na haar werk gegaan om die goeie nuus aan haar oor te dra.
“Toe sê my ma: ‘Jy’s gekies.’ En toe sê ek wát?!”
Dié 19-jarige sal graag vir Donnalee Roberts, wat die rol van die joernalis Carina Human in die rolprent vertolk, wil ontmoet.
Selfs een van haar kollegas, wat destyds die TV-reeks gekyk het, is al opgewonde, al spot haar boetie dat hulle gaan sê: “Kyk, die blondekop daar agter is Charlé.”
Van Zyl het uiteindelik die kans gekry om te doen wat hy nog altyd wou.
“Ek stel nog altyd belang in movies en daai klas dinge. Ek het net nog nie die geleentheid gekry nie,” vertel hy.
Die wenners sal van 15:00 op 1 September tot 05:00 op 2 September besig gehou word op die stel.
Hiervoor skrik Van Zyl nie. “Ek is gewoond aan deurnag, hoor! Ons sal maar sien wat gebeur.”