Lindsay Pistorius (39), ’n aptekersassistent van Pretoria, het dié skadevergoedingseis teen die ministers van polisie en die DKD by die hooggeregshof in Pretoria ingedien weens emosionele trauma en mediese uitgawes.
Sy is in Julie 2010 deur Elias Mothate met ’n tuinvurk in haar huis in Orchards, in die noorde van Pretoria, oorval.
Haar sewejarige seun was die aand tuis toe Mothate haar aangerand, verkrag en met haar eie motor ontvoer het.
Sy is erg beseer en moes ’n maand lank in die hospitaal aansterk.
Mothate is intussen skuldig bevind aan verkragting en lewenslank tronk toe gestuur.
Pistorius beweer die polisie het versuim om hul plig na te kom deur nie onmiddellik haar verklaring af te neem of haar saak behoorlik te ondersoek nie.
“Eers twee weke nadat ek uit die hospitaal ontslaan is, het die Akasia-polisie iemand gestuur vir my verklaring.”
Pistorius sê die polisie het ook bewyse op die toneel sonder handskoene hanteer.
“My eksman het my vertel hoe die polisie die volgende dag met hul families op die toneel opgedaag het.
“Hulle het die tuinvurk sommerso met hul kaal hande in die motor se kattebak gegooi en nie eens semen-monsters gevat of getoets vir vingerafdrukke in die huis nie.”
Pistorius eis verder weens die skade wat die polisie glo aan haar motor aangerig het, soos dat die radio uitgeruk is.
Sy eis ook van die DKD omdat Mothate glo ten tyde van die aanval op borgtog vrygelaat en verhoorafwagtend was kragtens ’n soortgelyke saak in die landdroshof in Brits.
Hy was boonop op parool weens gewapende roof ten tyde van albei dié bogenoemde voorvalle.
Pistorius eis ook weens die emosionele trauma wat haar seun gely het.
Die DKD en die polisie het dié bewerings ontken en gesê hulle sal dit ook in die hof betwis.
Die saak sal in Februarie 2015 in die hooggeregshof in Pretoria aangehoor word.