Want wanneer hy in Augustus ses word, gaan Liam gee eerder as kry.
Sy pa, Wian, het eintlik net ’n grappie gemaak toe hy so twee maande gelede voorstel Liam moet eerder vra vir geskenke vir hawelose diere.
“Hy het stil geraak,” sê Liam se ma, Maryke. “Hy het ’n bietjie gedink en effens teleurgesteld gelyk, maar toe sê hy dis reg, hy weet daar is diere wat honger en koud gaan slaap.”
Die Erlanks het houers by inkopiesentrums in Potchefstroom neergesit met ’n plakkaat oor Liam se projek daarby. “Dis vir Liam elke week ’n hoogtepunt as ons die skenkings gaan haal. Hy laai alles self af en pak dit in sy kamer,” sê Maryke.
Liam se verjaardagpartytjie is oor twee weke by die Dierebeskermingsvereniging (DBV) in Potchefstroom, waar hy al die skenkings gaan oorhandig.
Met Rapport se besoek het Liam trots al die skenkings in sy kamer gewys terwyl die gesin sukkel om hul vyf honde se snoete daaruit te hou. Hulle het al verskeie honde by die DBV aangeneem.
“Ek wil eendag ’n army word en tenks en vliegtuie bou,” sê Liam en wys opgewonde wat hy alles gebou het met ’n Lego-stel wat Hannelie Barkhuizen van Bellville in die Wes-Kaap vir hom gestuur het.
Sy was so beïndruk toe sy op Pierre van Niekerk se Facebookblad oor dieregesondheid van Liam se projek lees, sy het besluit hy verdien ook ’n geskenk.
Yvonne van Niekerk, ’n professionele bakker van Pretoria, betaal iemand in Potchefstroom om vir Liam ’n koek met ’n weermag- en dieretema te bak.
“Toe ek op Pierre se blad van Liam lees, het ek besluit as ’n jong kind so groothartig kan wees, kan ek dít vir hom doen.”
’n Fotograaf in die Noord-Kaap het ook aangebied om gratis foto’s op Liam se partytjie te neem.
“Ons is ontsettend opgewonde oor Liam se projek. Ek kan nie glo ’n kind van sy ouderdom aanvaar soveel verantwoordelikheid nie. Dit sê baie oor hoe sy ouers hom opvoed,” sê Martin Pienaar van die Potchefstroomse DBV-tak.
Pienaar sê by die partytjie gaan hulle diere uitbring vir die kinders om mee te speel.
Liam Erlank (5) by al die dieregeskenke in sy kamer wat hy al ingesamel het.| Foto: Christiaan Kotze