Veldwagters in die Tsavo- nasionale park in Kenia is in rou gedompel oor die dood van hul “ou vriend”.
Die 45-jarige olifant, bekend as Satao, is vermoedelik reeds verlede maand met gifpyle in die uitgestrekte natuurreservaat in die suidooste van Kenia doodgeskiet.
Die Tsavo-stigting, wat hom beywer vir die beskerming van dié reservaat en sy diere, het egter eers gister “met groot hartseer” aangekondig een van die wêreld se mees ikoniese olifante is vir sy groot ivoortande gestroop.
Nuus oor die dood van dié olifant, die jongste in ’n massiewe aanslag op Afrika se olifante, kom net ’n dag nadat die Konvensie oor Internasionale Handel in Bedreigde Spesies (Cites) gewaarsku het hele olifantbevolkings in Afrika kan binnekort weens stropery uitsterf.
“Dit is met groot leedwese dat ons kan bevestig daar is geen twyfel nie dat Satao doodgemaak is deur ’n stroper om te voorsien in die oënskynlike onversadigbare vraag na ivoor in verafgeleë lande,” het die stigting gesê.
Meer as 20 000 Afrika-olifante is in 2013 gestroop. In 2012 is 22 000 gestroop en in 2011 25 000.
Hul ivoor is duisende dollar per kilogram op die swartmark werd. – AFP