Ek voer jou weg na die gay nagklub waar ek werk. Hier kan mens baie leer deur om net bloot waar te neem wat om jou aangaan. In my nuwejaarskrywe het ek so bietjie uitgebrei oor die omgewing so gaan loer gerus hier daarna.
In dié blog wil ek graag die fokus plaas op een van ons vooraanstaande kroegmanne. Vir goeie redes sal ek hom Brian* noem.
Brian is een van ons personeellede wat al die langste hier werk en het beslis sy roete as heteroseksuele man in die gay wildernis uitgekerf.
Ek kan tot ‘n versekerde gevolgtrekking kom dat dit baie mans se waardigheid totaal sal aantas om basies in gekrimpte onderklere agter 'n toonbank in ‘n gay kroeg te werk. Brian sê dat dit aanvanklik baie intimiderend was, maar dat hy later oor sy onsekerhede gekom het oor sy lyf.
Kyk, moet my nie verkeerd verstaan nie: Brian is ‘n gesonde jong man wat sy studies in die opvoedkundige veld finansier deur sy werk in die kroeg. Hy is aantreklik en dis swaar om te glo dat hy nie ure deurbring in die gym nie, maar hy is van nature gespierd.
Hy het ‘n gemaklikheid in ‘n ongewone omgewing wat my laat wonder het wat mens kan leer by hom.
Hier is so 'n smakie van Brain se lewensfilosofie:
* Wees seker van jouself. Moet nie aan jouself twyfel nie, jy is waardig en goed genoeg om voluit te leef vir wat jy wil hê in die lewe. Al staan jy as hetero-man in ‘n gay bar!
* Hanteer almal met dieselfde met vriendelikheid en respek. Dis nie net die kenmerk van ‘n leier nie, maar ook van ‘n iemand wat in vrede leef met hulself. Dit geld ook vir mal drag queens wat kom gil by die kroeg!
* Spanningsvlakke kan vinnig hoog loop in ‘n besige kroeg, bly kalm in enige situasie. As almal se koppe uithaak, bly jy in beheer en bereik veel meer as om op die bandwagon te spring.
* Onthou om altyd vir jouself te lag! Humor is ‘n gesonde manier om stres te verminder en laat jou dadelik goed voel van binne. Oeps, die overdressed vrou was toe nie ‘n drag queen nie!
Ek put inspirasie uit Brian se houding en dink dat dié tipe wysheid eintlik vir almal kan geld, maak nie saak waar jy jouself in die lewe bevind nie.
Hoe lekker lag ek nou vir myself toe ek my oog toeplak met eyelash gom...
Ons probeer maar weer en gaan laggend voort!
*Nie sy regte naam nie
Foto: Bazil D Photography