In die werklike lewe is Kersfees die afgelope 13 jaar twee keer as’t ware amper “gesteel”.
Voor die een van 1999 was die Grinch die millenium-rekenaargogga. Derduisende het gevrees dit sou hul laaste Kersvieringe wees voor die apokalips. Vanjaar was dit die Maja-Grinch. Dié eindtydvrese is darem ’n paar dae voor Kersfees al besweer toe die son op 21 Desember opgekom en gesak het.
Fritz Gaum stel in sy rubriek hiernaas indringende vrae oor Kersfees wat hy sê toenemend ook deur Afrikaanses gevra word. Outydse twyfelvrae het postmoderne skeptisisme geword, sê hy.
Dat skeptisisme oor godsdiens oor die algemeen aan die toeneem is, word bevestig deur uitslae die afgelope week van ’n studie deur die Amerikaanse Pew-navorsingsentrum. Nie-godsdienstiges is nou die derde grootste “geloofsgroep” ter wêreld. Christene is die grootste groep, gevolg deur Moslems.
Maar Christene kan gerus slaap. Soos die Grinch besef het, kán Kersfees nie van gelowiges gesteel word nie. En lede van ander gelowe, agnostici en ateïste se harte moet “twee nommers te klein” wees om nie ook omarm te voel deur die welwillendheid van die feestyd nie.