Publications
Partners
’n Vasgestelde rentekoers op verbandlenings en motorfinansiering is nie vir almal die beste manier om hulle teen stygende rentekoerse te verskans nie.
Noudat die prima uitleenkoers vir die tweede keer vanjaar verhoog is, tot 9,25%, vra al hoe meer verbruikers of ’n vasgestelde koers die aangewese ding is.
John Loos, huishoudelike en eiendomstrateeg van FNB Huislenings, sê die besluit hang van individuele omstandighede af.
“As jou maandelikse kontantvloei onder erge druk gaan kom weens die jongste verhoging én verwagte verdere verhogings, is dit beter om rentekoerse vas te pen,” sê hy.
Dit sal oor die tydperk waarvoor die koers vasgestel is – gewoonlik tussen 12 en 24 maande en soms oor 5 jaar – sekerheid gee oor kontantvloei.
Kliënte wat so iets oorweeg, moet egter in gedagte hou dat die koerse vasgestel word op tussen 0,75 en 2 persentasiepunte meer as die huidige uitleenkoers.
Die grootte van die lening, die verhouding tussen die leenbedrag en die waarde van die huis en die termyn het gewoonlik ’n invloed. Dit bring mee dat die uitstaande leningsbedrag met die ooreenstemmende bedrae verhoog word en daardeur word die uitstaande rentebedrag op die lening ook verhoog.
Mense wat ná die jongste verhoging nog finansieel kop bo water kan hou, kan beter daaraan toe wees indien hulle maandeliks ’n bykomende bedrag op hul huisverband of motorlening afbetaal.
Daardeur verskans jy jou teen verdere stygings omdat die kapitaalbedrag waarop rente bereken word minder sal wees as die uitleenkoers verder styg.
Op lang termyn is dit beter om so gou as moontlik te begin om kapitaal op die lening terug te betaal en sodoende die rente op die uitstaande bedrag te verlaag.
