McIntosh, Krieket Suid-Afrika (KSA) se voormalige finansiële hoof, is reeds “geruime tyd” lank ’n “konsultant” van die Suid-Afrikaanse spelersvereniging (Saca).
Dít ondanks die feit dat hy vroeër vanjaar deur ’n ministeriële ondersoekkomitee gekruisig is vir sy aandeel in dié skandaal én terwyl ’n siviele geding teen hom steeds deur KSA gedryf word.
Dié komitee is gelas deur die sportminister, Fikile Mbalula, en is gelei deur die oudregter Chris Nicholson.
Nicholson het in Maart bevind die miljoene rande se bonusgeld – wat aan McIntosh, Gerald Majola en byna 40 ander KSA-werknemers betaal is vir die aanbieding van die Indiese Premierliga-toernooi en die Kampioenetrofee-reeks in 2009 – was ongemagtig.
Majola het digby R1,8 miljoen ontvang en McIntosh sowat R?1,4 miljoen, vir sy werk as direkteur van dié toernooie.
Benewens dié bonusse is Majola en McIntosh ook deur KSA vergoed met sowat sewe keer hul maandelikse salarisse.
Majola is in Oktober afgedank ná ’n onafhanklike tugverhoor en Mbalula het gelas dat albei se bonusse deur middel van “’n siviele proses” herwin word.
McIntosh het skielik uit sy KSA-pos bedank kort vóór die bonus-bom gebars het.
Tony Irish, Saca se uitvoerende hoof, het by navraag aan Rapport bevestig dat McIntosh as ’n konsultant vir dié organisasie optree.
“Die spelers het, ingevolge Saca se MOU (memorandum van verstandhouding, wat in 2010 onderteken is), ’n winsdelingsooreenkoms met KSA,” het Irish gesê.
“Ons gebruik Don se krieketervaring om te verseker dat ons die finansiële aspekte van dié ooreenkoms die beste kan benut.”
Volgens Jacques Faul, KSA se waarnemende uitvoerende hoof, is dié liggaam bewus van McIntosh se betrokkenheid by Saca.
“Saca is ’n aparte entiteit en KSA kan nie aan hom voorskryf wie in diens geneem mag word nie,” het Faul gesê. “In dié stadium gaan ons voort met die regsgeding (teen McIntosh).”