Publications
Partners
Viljoen het die goue medalje in die spiesgooi in 2006 in Melbourne en in 2010 in Nieu-Delhi gewen – en by albei Speles afgereken met dieselfde twee Australiërs wat vanjaar wéér? haar sterkste teenstand sal wees.
In 2006 het Viljoen (toe 23) goud met ’n wengooi van 60.72 voor Kim Mickle (58.18) en Kathryn Mitchell (55.12) gewen. Vier jaar later was die Suid-Afrikaner baas met ’n 62.34 teenoor Mickle se 60.90 en Mitchell se 54.25.
Sedert Nieu-Delhi het Viljoen in 2011 by die wêreldkampioenskappe ’n bronsmedalje gewen en in 2012 haar persoonlike beste tot 69.35 verbeter.
Mickle is die Statebond-pasaangeër tot dusver vanjaar met haar 66.83 in Maart in Melbourne; gevolg deur Mitchell (66.10 in Februarie in Adelaide) en Viljoen (64.77 in April in Pretoria).
Viljoen het sewe keer in 13 vorige tweestryde met Mickle afgereken, maar die Aussie het in ál vyf hul laaste kragmetings gewen.
Viljoen was agt keer in 11 vorige byeenkomste teen Mitchell baas.
) Woensdagaand kan potensieël een van Suid-Afrikaanse atletiek se gróót aande wees: terwyl Viljoen en haar Aussie-susters mekaar in die hare vlieg, het Wayde van Niekerk (400, 21:30) en Zarck Visser (verspring, 19:45) óók sterk medalje-aansprake.
Van Niekerk spring as “net” nommer vier in die Statebond weg ná die Olimpiese kampioen, Kirani James van Grenada, 43.74), Isaac Makwala (Botswana, 44.01) en Deon Lendore (Trinidad, 44.36).
Maar sy onlangse tweede plek in New York (44.38) teen die Amerikaanse wêreldkampioen LaShawn Merritt sal eersgenoemde drie laat beef.
Visser (8.31) is die Statebond se nommer twee in ’n item waarin hy rêrig nie slapelose nagte oor enige van sy teenstanders sal hê nie.
Die nommer een, die Brit Greg Rutherford, het maande gelede met ’n 8.51 ontplof, maar hy kon sedertdien nie beter as 8.24 nie.
) Die tienkamper Willem Coertzen tree Dinsdagaand (22:00) aan vir die laaste van sy 10 items, die 1 500. Hy’s die voorste Statebonder vanjaar en hy lyk pure goud.
) Donderdagaand (21:15) is die eindronde van die 400-hekkies vir mans – en Cornel Fredericks is die vinnigste Statebonder vanjaar.
Alle SA oë sal ook op Fredericks se oefenmaat LJ van Zyl wees, wat aan sy derde Statebondspele deelneem.
Van Zyl het in 2006 goud gewen en in 2010 silwer. Hy wás al met ’n 47.66 vinniger as enige ander Statebonder, maar hy het dit nog nie vanjaar gewys nie (sy beste vanjaar is 48.96).
Diskus-breker Victor Hogan kán Donderdagaand (19:00) verras ná sy vyfde plek laas jaar by die wêreldkampioenskappe.
Langasems André Olivier (800, Donderdag 20:50) en Johan Cronjé (1 500, Saterdag 20:35) kan verras, veral in stadige, taktiese wedlope.
