Publications
Partners
Brad MacLeod-Henderson, die Haaie se afrigter, het gisteraand sy span se verrassende Curriebeker-sege van 26-15 oor die Blou Bulle só opgesom.
“Die ouens het 80 minute lank met ’n groot poging gekom. Om die Bulle hier te klop was van uiterste belang vir ons veldtog en ek is verheug dat ons dit kon vermag het.”
Dit het in die eerste helfte bars gegaan met die Haaie en van balbesit was daar met rukke min sprake vir die besoekers.
Enkele oomblikke voor rustyd was die Bulle nog in beheer en 12-6 voor – totdat die Haaie se Bok-vleuel Lwazi Mvovo onderskep en teen die verloop van die spel gaan druk het.
Die tuisspan was sowat tien minute die tweede helfte in ewe skielik 12-23 agter nadat Mvovo se vleuelmaat, S’bura Sithole, ’n hoekskoppie op die aanval bemeester en die Haaie se tweede drie gedruk het.
“Ons het die inisiatief verloor en die buffer wat die Haaie gekry het, het ons onder druk gesit,” het Frans Ludeke, die Bulle se breier, agterna gesê.
Die Bulle se belangrikste grondslag – die lynstane – het toe boonop begin lol.
“Dit was asof dit toe ’n sielkundige struikelblok vir ons geraak het.
“Die drie voor rustyd was ’n keerpunt, maar ons het nie ons kanse gebruik nie.
“Veral ons besluitneming was swak,” het Ludeke gesê.
MacLeod-Henderson sê hulle het geweet die Bulle sal onder druk wees as hul nie goeie lynstaanbesit kry nie.
“Ek is baie tevrede met die wyse waarop ons in dié faset meegeding het. Die Bulle se rolmale is doeltreffend en ons kon dit tot ’n groot mate neutraliseer.”
Die Haaie se duidelik verligte breier het gesê Mvovo, wat in die week deur die Springbokke vrygestel is, se impak kan nie onderskat word nie.
“Lwazi is ’n fantastiese rugbyspeler en het ’n groot verskil gemaak.”
MacLeod-Henderson het die grootste lof egter vir sy losskakel, Lionel Cronjé, gehad.
Cronjé het oor die afgelope paar seisoene meer as genoeg kritiek gekry, maar hy was gisteraand op sy stukke.
Die skoppie wat op Sithole se drie uitgeloop het, was ’n juweel.
Dit is juis dié soort afwisseling wat afwesig was in die Bulle se repertoire.
Die Ligbloues se aanslag in vanjaar se kompetisie is met dié nederlaag op Loftus naby aan ontspoor.
Die aanduiding is daar dat die Bulle ’n derde keer in vier seisoene nie die halfeindronde gaan sien nie.
Ludeke wou nie sake vooruitloop nie en het aangedui sy span gaan hou “by die proses waarin die Bulle glo”.
