Cornel wen vir Afrika

Laat net een blikskottel weer sê Suid-Afrikaanse atlete is nie gepantser om by groot internasionale byeenkomste hul teenstanders bloedneus te gee nie.

Cornel Fredericks het gisteraand in Marrakesj, Marokko, nie sy eerste nie, nie sy tweede nie, maar sy vyfde indrukwekkende oorwinning vanjaar in die 400-hekkies in die internasionale arena behaal.

Hy het by die Interkontinentale Beker-byeenkoms in die Afrika-frokkie in ’n vinnige 48.34 gewen.

Dié sege laat sy gouemedalje-uitstalkas tot barstens toe oorloop, nadat hy vroeër vanjaar ook die Statebonds- en Afrika-titels gewen het – én boonop ook baas was by die onlangse Weltklasse-Diamantliga in Zürich, ’n tradisieryke byeenkoms wat as die mini-Olimpiese Spele bekend is.

Die 24-jarige Pretorianer het gisteraand afgereken met Kariem Hussein (Europa, 48.47) en Javier Culson (Amerikas, 48.88). Hy het boonop ’n koel $30 000 (ongeveer R330 000) met sy oorwinning verdien.

* En, kort op Fredericks se hakke was ons spiesgooi-koningin Sunette Viljoen.

Sy het die Tsjeggiese wêreldkampioen Barbora Spotakova die skrik van haar lewe gegee.

Viljoen was ná haar derde gooi met ’n afstand van 63.76 in die eerste plek, voordat Spotakova met ’n yslike 65.52 losgetrek het om die gouemedalje voor die Suid-Afrikaner se neus weg te raap.

Nóg twee Suid-Afrikaners wat vanjaar gróót golwe in wêreldatletiek gemaak het, Zarck Visser en Wayde van Niekerk, het self nie op hul laat wag nie en kan tevrede voel met hul vertonings.

Visser was in die verspring derde met ’n sprong van 7.96 ná die Europese wenner Ignisious Gaiseh (8.11).

In die 400 het Van Niekerk sý droomseisoen met ’n tyd van 45.27 afgesluit – hy het net-net nie die medalje-podium gehaal nie, met die Amerikaanse spierpaleis LaShawn Merritt eerste (44.60), gevolg deur Botswana se Isaac Makwala (44.84).

Wenda Nel was in die 400-hekkies vyfde in 55.80 ná die Jamaikaanse wenner Kaliese Spencer (53.81), terwyl gewigstoter Orazio Cremona sesde met ’n 19.96 was, met die Duitser David Storl wat met ’n 21.55 gewen het.

Chris Harmse het in die hamergooi sewende met ’n 71.77 geéindig. Krisztian Pars het dié item met ’n gooi van 78.99 gewne, met Harmse se Afrika-spanmaat Mostafa Elgamel tweede (78.89).